قۇرلىقتىق حوككەي ليگاسى اياسىندا ەلوردالىق «بارىس» 27 اقپاندا رەسەيدە «اۆانگارد» (ومبى) كومانداسىمەن كەزدەستٸ, دەپ حابارلايدى "ۇلت اقپارات".
ەكٸ كوماندا اراسىنداعى سوڭعى تٶرت ويىننىڭ ٷشەۋٸندە قازاقستاندىق كلۋبتىڭ مەرەيٸ ٷستەم بولدى.
«بارىس» تۋرنير كەستەسٸندە 59 ويىننان كەيٸن 69 ۇپايمەن 11-ورىندا كەلەدٸ. ال «اۆانگارد» 59 ويىننان كەيٸن 82 ۇپاي جيناپ, 4-ورىندا تۇر.
كوماندالار پلەي-وفف كەزەڭٸنە شىعۋ مٷمكٸندٸگٸنە قول جەتكٸزٸپ قويعان بولاتىن. سوعان قاراماستان بٷگٸنگٸ ويىن تارتىستى ٶتتٸ.
ەسەپتٸ 2-مينۋتتا «بارىس» ويىنشىسى كيريلل پانيۋكوۆ اشتى. ال 16-مينۋتتا «اۆانگارد» ساپىنان يليا كوۆالچۋك تارازى باسىن تەڭەستٸردٸ.
ەكٸنشٸ كەزەڭنٸڭ 21-مينۋتىندا رەسەيلٸك حوككەيشٸ سەرگەي تولچينسكيي «اۆانگاردتى» العا شىعاردى. ال 41-مينۋتتا «بارىس» حوككەيشٸسٸ داررەن ديتس كٶزدەگەن نىسانادان مٷلت كەتكەن جوق. سەرگەي تولچينسكيي 42-مينۋتتا قايتادان رەسەيلٸك كلۋبتىڭ باسىمدىعىن ارتتىرسا, دەنيس زەرنوۆ ەسەپتٸ ٷستەمەلەي تٷستٸ. ال 59-مينۋتتا سەرگەي چيناكوۆ قورىتىندى ەسەپتٸ بەلگٸلەدٸ. كەزدەسۋدە «بارىس» قارسىلاسىنان 2:5 ەسەبٸمەن جەڭٸلٸپ قالدى.
ەستەرٸڭٸزگە سالا كەتەلٸك, بۇدان بۇرىن «بارىس» قىتايدىڭ «كۋنلۋن رەد ستار» كومانداسىنان باسىم تٷستٸ.
بٷگٸن قۇرلىقتىق حوككەي ليگاسى تۇراقتى كەزەڭٸندە كوماندالار سوڭعى تۋر ويىندارىن ٶتكٸزەدٸ. پلەي-وفف كەزەڭٸ 2 ناۋرىزدا باستالادى. فينال -30 سەۋٸردە.
