قۇرلىقتىق حوككەي ليگاسى اياسىندا ەلوردالىق «بارىس» بٷگٸن, 16 اقپاندا ٶز ايدىنىندا «اۆانگارد» (ومبى) كومانداسىن قابىلدادى, دەپ حابارلايدى "ۇلت اقپارات".
ەكٸ كوماندا بۇعان دەيٸن 61 مەرتە شەبەرلٸك بايقاستى. ونىڭ 21-دە «بارىس» باسىمدىق تانىتسا, قالعانىندا «اۆانگاردتىڭ» مەرەيٸ ٷستەم بولعان.
بيىل كوماندالار بٸر-بٸرٸمەن ەكٸ مەرتە كەزدەستٸ. قارسىلاستار بٸر-بٸر مەرتەدەن جەڭٸسكە جەتتٸ. ولار بٷگٸنگە دەيٸن پلەي-وفف كەزەڭٸنە شىعىپ ٷلگەردٸ. ەندٸگٸ كەزەكتە تۋرنير كەستەسٸندەگٸ جاعدايىن جاقسارتىپ, ٶزٸنە ىڭعايلى قارسىلاسقا جولىعۋ مٸندەتٸ الدارىندا تۇر.
بٷگٸنگٸ كەزدەسۋ تارتىستى ٶتتٸ. ەسەپتٸ 6-مينۋتتا «بارىس» حوككەيشٸسٸ ەليحان ەسەتوۆ اشتى. وعان 9-مينۋتتا رەسەيلٸك ريد بۋشە بٸر شايبامەن جاۋاپ بەرٸپ, تارازى باسى تەڭەستٸ. ال 30-مينۋتتا نيكيتا ميحايليس ەلوردالىق كلۋبتى تاعى دا العا شىعاردى. ويىننىڭ 59-مينۋتىندا «اۆانگارد» ويىنشىسى كوربان نايت تارازى باسىن تەڭەستٸرٸپ كەتتٸ. وسىلايشا كەزدەسۋ وۆەرتايمعا ۇلاستى. وۆەرتايمدا نيكيتا ميحايليس جەڭٸس شايباسىن سوقتى. ويىن 3:2 ەسەبٸمەن «بارىستىڭ» باسىمدىعىمەن اياقتالدى.
ەندٸ «بارىس» 18 اقپاندا ەلوردادا رەسەيدٸڭ «اۆتوموبيليست» كومانداسىن قابىلدايدى.
