قۇرلىقتىق حوككەي ليگاسى اياسىندا ەلوردالىق «بارىس» بٷگٸن, 3 اقپاندا رەسەيدە «مەتاللۋرگ» (ماگنيتوگورسك) كومانداسىمەن كەزدەستٸ, دەپ حابارلايدى قازاقپارات.
ەكٸ كوماندا تۋرنير كەستەسٸندە قاتارلاس كەلەدٸ. دەگەنمەن رەسەيلٸك كلۋبتىڭ جاعدايى تەۋٸر. تۋرنير كەستەسٸندە 51 ويىننان كەيٸن 69 ۇپاي جيناپ, 7-ورىندا تۇر. ال «بارىس» 51 ويىننان كەيٸن 60 ۇپايمەن 12-ورىندا كەلەدٸ.
سول سەبەپتٸ قازاقستاندىق كلۋب العاشقى مينۋتتان شابۋىلعا يەك ارتقان بولاتىن. ەكٸنشٸ كەزەڭنٸڭ 23-مينۋتىندا «بارىس» حوككەيشٸسٸ كيريلل پانيۋكوۆ ەسەپ اشسا, وعان 31-مينۋتتا «مەتاللۋرگ» ساپىنان اندرەي نەستراشيل تارازى باسىن تەڭەستٸردٸ.
ال 46-مينۋتتا رەسەيلٸك ميحايل پاشنين «مەتاللۋرگتٸ» العا شىعاردى. رەسەيلٸك تاعى بٸر حوككەيشٸ نيكولاي گولدوبين 54-مينۋتتا قورىتىندى ەسەپتٸ بەلگٸلەدٸ. «بارىس» قارسىلاسىنا 1:3 ەسەبٸمەن جول بەردٸ.
ەندٸ قازاقستاندىق كلۋب 5 اقپاندا رەسەيدە «سيبير» (نوۆوسٸبٸر) كومانداسىمەن كەزدەسسە, 7 اقپاندا قايتادان «مەتاللۋرگپەن» تاعى بٸر ويىن ٶتكٸزەدٸ.
ەستەرٸڭٸزگە سالا كەتەلٸك, بۇدان بۇرىن ەلوردالىق كلۋب «بارىس» ەلوردادا «اۆتوموبيليستكە» ەسە جٸبەردٸ.
