حوككەي: «بارىس» مەسكەۋلٸك «سپارتاكتى» ۇتتى

«بارىس» كلۋبى قۇرلىقتىق حوككەي ليگاسىنىڭ كەزەكتٸ تۋرىندا مەسكەۋدٸڭ «سپارتاگىن» قابىلدادى, دەپ حابارلايدى "ۇلت اقپارات".

وسىنىڭ الدىندا قاتارىنان بەسٸنشٸ رەت جەڭٸلگەن ەلوردالىق كوماندانىڭ جاعدايى مەز ەمەس-تٸ.

تۋرنير كەستەسٸندە 25 ۇپايمەن جالپى ەسەپتە 19-ىنشى, ال شىعىس كونفەرەنتسيياسىندا 10-ورىندا تۇرعان ەدٸ. پلەي-وفف دوداسىنا قاتىسۋعا مٷمكٸندٸك بەرەتٸن ٷزدٸك سەگٸزدٸككە ٸلٸگۋ بيىل «بارىسقا» وڭايعا تٷسپەيتٸن تٷرٸ بار.

ال 34 ۇپاي جيناعان «سپارتاك» جالپى ەسەپتە 12-ٸنشٸ, باتىس كونفەرەنتسيياسىندا 6-ساتىدا تۇرعان بولاتىن.

«سپارتاكپەن» ويىندا بٸرٸنشٸ كەزەڭدە كيورتيس ۆالك 13-مينۋتتا ەسەپ اشتى. ەكٸنشٸ كەزەڭدە دە وسى ٷشتٸك كٶزگە تٷسٸپ, ك.ۆالك, لينۋس ۆيدەلل قاتىسقان ەدەمٸ كومبيناتسييادان كەيٸن ياكوب ليليا ەسەپتٸ 2:0-گە جەتكٸزدٸ.

ويىن بارىسىندا ەلوردالىق حوككەيشٸلەر جيٸرەك تەرتٸپ بۇزعانىمەن, ونى مەسكەۋلٸكتەر پايدالانا المادى.

ٷشٸنشٸ كەزەڭدە 55-مينۋتتا قوناقتاردان يوري لەحتەريانىڭ پاسىنان كەيٸن سەرگەي شيروكوۆ ەسەپتٸ قىسقارتتى.

وسىلايشا «بارىس» 2:1 ەسەبٸمەن جەڭٸسكە جەتتٸ.

كەلەسٸ تۋردا يۋريي ميحايليستٸڭ شەكٸرتتەرٸ 1 جەلتوقسان كٷنٸ ٶز ايدىنىندا «سوچي» كلۋبىن قابىلدايدى.