بٷگٸن رەسەيدە قۇرلىقتىق حوككەي ليگاسى اياسىندا ەلوردالىق «بارىس» «امۋر» (حاباروۆسك) كومانداسىمەن كەزدەستٸ, دەپ حابارلايدى "ۇلت اقپارات".
ەستەرڭٸزگە سالا كەتەلٸك, ەكٸ كٷن بۇرىن ەكٸ كوماندا حاباروۆسكٸدە بٸر ويىن ٶتكٸزدٸ. بۇل ويىندا «بارىس» بۋلليتتەن 5:4 ەسەبٸمەن باسىم تٷسكەن ەدٸ.
«امۋر» حوككەيشٸلەرٸ سول كەتكەن ەسەنٸ قايتارۋعا تىرىستى. كەزدەسۋ باسىنان ساۋاتتى ويىن كٶرسەتتٸ. نەتيجەسٸندە ولاردىڭ قاتارىنان 9-مينۋتتا كيريلل راسسكازوۆ ەسەپ اشىپ كەتتٸ. ال 17-مينۋتتا «امۋر» ساپىنان گينەك زاگورنا ەسەپتٸ ٷستەمەلەي تٷستٸ.
گينەك زاگورنا 21-مينۋتتا تاعى بٸر مەرتە مەرگەنلٸك تانىتسا, 32-مينۋتتا الەكساندر گورشكوۆ «بارىس» قاقپاسىن دەل كٶزدەدٸ.
ٷشٸنشٸ كەزەڭنٸڭ 41-مينۋتىندا ەلوردالىق كلۋب قاتارىنان داررەن ديتس ەسەپ ايىرماسىن قىسقارتتى. بۇدان كەيٸن قازاقستاندىق كلۋبتىڭ گول سوعاتىن بٸرنەشە مٷمكٸندٸگٸ بولدى. جەڭٸس شايباسىن 59-مينۋتتا «امۋر» حوككەيشٸسٸ ۆلاديمير بۋتۋزوۆ سوقتى. وسىلايشا «بارىس» قارسىلاسىنان 1:5 ەسەبٸمەن جەڭٸلٸپ قالدى.
«بارىس» بۇدان كەيٸن 8 قاڭتاردا ەكاتەرينبۋرگتە «اۆتوموبيليستپەن» مۇز ايدىنعا شىعادى. ودان كەيٸن 12 قاڭتاردا ەلوردادا رەسەيدٸڭ «اك بارس» (قازان) كومانداسىن قابىلدايدى.
