بالالار ەدەبيەتٸن قولداۋعا بٸر جىلدى عانا ەمەس, ون جىلدى ارناساق تا جەتكٸلٸكسٸز. سەبەبٸ بالالار ەدەبيەتٸ دەگەن ٶتە ٷلكەن تاقىرىپ. بۇل جولدا اتقارىلىپ جاتقان شارۋالار از ەمەس. مەسەلەن, Steppe & World باسپا ٷيٸ قازاقشا وقۋدى ترەندكە اينالدىرۋ ماقساتىندا, دٷنيەجٷزٸنٸڭ ەڭ كٶپ سۇرانىسىنا يە بولعان كٸتاپتاردى اۋدارا باستادى. ونىڭ ٸشٸندە تانىمالى – حەرري پوتتەر سەريياسى.
جوان روۋليڭنٸڭ سيقىرشى بالا حەرري پوتتەر تۋرالى روماندار سەريياسى قازاق بالاسىنا نە بەرەدٸ? تۋىندىنىڭ قازاق تٸلٸنە اۋدارىلۋى قانشالىقتى ماڭىزدى? «ۇلت» پورتالى وسى سۇراقتاردىڭ جاۋابىن ٸزدەپ كٶردٸ.
رايسا سايرانقىزى, Steppe & World باسپا ٷيٸنٸڭ نەگٸزٸن سالۋشى:
«حەرري پوتتەردٸ قازاق بالالارى عانا ەمەس ەلەمدەگٸ بارلىق بالا سٷيسٸنٸپ وقيدى. ال وسىنداي تانىمال ەڭبەكتٸڭ اۋدارۋ بٸز ٷشٸن مٸندەت. العاشقىدا 80 تٸلدە جارىق كٶرگەن سەرييانىڭ ەلٸ كٷنگە قازاقشاعا اۋدارىلماعانىنا, 20 جىلدىڭ ٸشٸندە بۇل ٸستٸ ەشكٸم قولعا الماعانىنا العاش تاڭعالعانىم راس. بۇل مەسەلەنٸ شەشۋدٸ دەرەۋ قولعا الدىق. بالالارعا ارنالعان ەلەمگە ەيگٸلٸ شىعارمالاردى “اننا فرانكتىڭ كٷندەلٸگٸ”, “گرۋففالو”, “حەرري پوتتەر مەن پەلساپا تاس” دەگەن اتاۋلارمەن قازاق تٸلٸنە اۋدارا باستادىق. “حەرري پوتتەر مەن پەلساپا تاس” رومانىن اۋدارۋعا بٸر جىلدان استام ۋاقىت كەتتٸ. از عانا ۋاقىتتىڭ ٸشٸندە كٶپ وقىرمانىن تاۋىپ ٷلگەرگەن بۇل كٸتاپ, ەڭ بٸرٸنشٸدەن, بالالاردى كٸتاپ وقۋعا باۋلۋعا سەبەپ بولا الادى. ٶيتكەنٸ بۇل تۋىندىنىڭ كينوسى دا, مۋلتفيلمٸ دە بار. ال كٸتابىن وقىڭان بٶلەك لەززات ەكەنٸن كەز كەلگەن وقىرمان جاقسى بٸلەدٸ»
فاريزا قۋات, اتا-انا:
«مەنٸڭ ۇلىم 12 جاستا. حەرري پورتتەردٸڭ كينوسىن ٷزبەي كٶرەدٸ. العاشقىدا بالالاردى باۋراپ الاتىن نەتكەن كينو دەپ تاڭعالۋشى ەدٸم. ەندٸ بۇل كٸتاپتىڭ قازاقشالانعانىن ەستٸپ, الىپ بەرۋٸمدٸ ٶتٸندٸ. بۇل كٸتاپ سەرييا بولىپ, كٶپ بولىپ شىقسا ەر سەريياسىن الا بەرگٸسٸ كەلەدٸ ەكەن بالا دەگەن. ۇلىمنىڭ سونشا قۋانعانىن كٶرٸپ, تاڭعالدىم. سۇرانىسقا يە كٸتاپتى نەگە الىپ بەرمەسكە? كٸتاپ بالاعا نە بەرەدٸ دەپ ويلاۋدىڭ ٶزٸ ارتىق. ەڭ باستىسى بالا كٸتاپ وقيدى. ونىڭ ٷستٸنە جاز مەزگٸلٸندەگٸ دەمالىس كەزٸندە بالالار ٷشٸن تاپتىرمايتىن مٷمكٸندٸك. كٷن سالقىنداعاندا دالادا ويناپ السا, ىستقى كەزدە تٷسكٸ ۋاقىتتا بٸر مەزگٸل كٸتاپ وقيدى. بالالاردى اتا-انادان كەيٸن كٶگٸلدٸر ەكران مەن كٸتاپ تەربيەلەيدٸ دەگەن پٸكٸرگە جٷز پايىز قوسىلامىن».
نازگٷل قوجابەك, جوبانىڭ جاۋاپتى رەداكتورى:
«كٸتاپ تۋرالى العاش اقپارات بەرٸپ, مۇقاباسىن ەلەۋمەتتٸك جەلٸلەردە جاريياعالى بەرٸ «نەگە «گارري» ەمەس, «حەرري?», «نەگە «روۋلينگ» ەمەس, «روۋليڭ?» دەگەن سۇراق كٶبەيدٸ. بٸز تٸكەلەي اعىلشىن تٸلٸنەن اۋداردىق. اعىلشىن تٸلٸندە Harry, «حەرري» بولىپ وقىلادى. «ە» دىبىسى اعىلشىن تٸلٸندە دە, قازاق تٸلٸندە دە بار. سول سيياقتى جازۋشىنىڭ تەگٸ دە قازاق تٸلٸندە بار «ڭ» دىبىسىمەن اياقتالىپ تۇر. سوندىقتان «گارري» ەمەس, «حەرري», «روۋلينگ» ەمەس, «روۋليڭ» بولادى. سونىمەن بٸرگە ەگەر قازاقستان لاتىن ەلٸپبيٸنە تولىقتاي كٶشكەن جاعدايدا «گارري» دەپ اۋدارساق, Garry دەپ جازۋعا تۋرا كەلەدٸ. وسىلايشا قاتە جٸبەرۋٸمٸز مٷمكٸن».
راۋان شىنتاەۆا, مۇعالٸم:
«حەرري پوتتەر ەلەمگە تانىمال كەيٸپكەر, تانىمال تۋىندى. مەكتەپ وقۋشىلارىنىڭ سۇرانىسىنا يە بولعان تۋىندىنىڭ قازاقشاعا اۋدارىلۋى قۋانىشتى ەكٸ ەسەلەتتٸ. بالاعا نە بەرەدٸ دەگەن ساۋالعا كەلسەك.... بٸرٸنشٸدەن, بالانى جالىقتىرمايدى, كٸتاپ وقۋعا دەگەن قىزىعۋشىلىعىن ارتتىرا تٷسەدٸ. ەكٸنشٸدەن, ەلەم ەدەبيەتٸمەن ەتەنە جاقىنداسادى. ەلەم ەدەبيەتٸنٸڭ دە ەرەكشەلٸگٸن تٷسٸنە باستايدى. ٷشٸنشٸدەن, نەگٸزگٸ كەيٸپكەر حەرري بالالاردى ەڭبەكقورلىققا, ادالدىققا, جاۋاپكەرشٸلٸككە شاقىرادى. بۇل تۋىندىنىڭ اۋدارىلۋى قازاق بالالار ەدەبيەتٸنە قوسىلعان ٶتە ٷلكەن ٷلەس دەپ بٸلەمٸن».
ەستەرٸڭٸزگە سالا كەتەيٸك, Steppe & World باسپا ٷيٸ قازاقشا وقۋدى ترەندكە اينالدىرۋ ماقساتىندا, دٷنيەجٷزٸنٸڭ ەڭ كٶپ سۇرانىسىنا يە بولعان كٸتاپتاردى اۋدارا باستادى. ونىڭ ٸشٸندە تانىمالى – حەرري پوتتەر سەريياسى. بيىل قازاقستاندا «بالالار ەدەبيەتٸ» جىلى دەپ جارييالانعانى بەلگٸلٸ. وسى ورايدا, بالالار ەدەبيەتٸن قولداۋعا بٸر جىلدى عانا ەمەس, ون جىلدى ارناساق تا جەتكٸلٸكسٸز. سەبەبٸ بالالار ەدەبيەتٸ دەگەن ٶتە ٷلكەن تاقىرىپ. بۇل جولدا اتقارىلىپ جاتقان شارۋالار از ەمەس.
