قر ستراتەگييالىق جوسپارلاۋ جەنە رەفورمالار اگەنتتٸگٸنٸڭ تٶراعاسى قايرات كەلٸمبەتوۆ ەل بويىنشا حالىق ساناعى قالاي ٶتكەنٸن ايتىپ بەردٸ, دەپ حابارلايدى قازاقپارات.
«كەز كەلگەن مەملەكەتكە ۇلتتىق ستاتيستيكا جٷيەسٸ قاجەت, بٸز قانشا ازاماتىمىز بار ەكەنٸن, قىزمەتٸمٸزدٸڭ بەلگٸلٸ بٸر بٸر اسپەكتٸلەرٸنە قاتىستى جاعداي قانداي ەكەنٸن بٸلۋٸمٸز كەرەك. ساناق ون جىلدا بٸر رەت جٷرگٸزٸلەدٸ. بۇل – بۇۇ جٷيەسٸ ۇستاناتىن ەرەجەلەر. اتاپ ايتقاندا, بٸز ەۋروپالىق ستاتيستيكا بيۋروسىمەن تىعىز جۇمىس ٸستەيمٸز. 10 جىلدا بٸر مەرتە قولدا بار دەرەكتەردٸ تٷزەتۋ جەنە راستاۋ جٷرگٸزٸلەدٸ», - دەدٸ قايرات كەلٸمبەتوۆ «حابار» تەلەارناسىنداعى «ۇلتتىق مٷددە» باعدارلاماسىندا.
اگەنتتٸك باسشىسى حالىق ساناعى كٷردەلٸ ۋاقىتتا جٷرگٸزٸلگەنٸن اتاپ ٶتتٸ.
«ساناقتى قازٸر ٶتكٸزۋ قاجەت پە ٶزٸ?» دەگەن مەسەلە كٶتەرٸلدٸ. بٸر جاعىنان, ونى كەيٸنگە قالدىرۋ مٷمكٸن بولمادى, ەكٸنشٸ جاعىنان, سۇراقتار نەگە كٶپ دەگەندەر دە بولدى. ورتا ەسەپپەن 50 سۇراق بولدى, بٸراق كەيبٸر باعىتتار بويىنشا جٷزگە جەتتٸ. ەرينە, سىن بولدى, بٸزدٸڭ كەز كەلگەن مەملەكەتتٸك ناۋقانىمىز حالىقتىڭ ەكٸۇداي سەزٸمٸن تۋدىرادى», - دەدٸ ق. كەلٸمبەتوۆ.
ونىڭ ايتۋىنشا, قازاقستاننىڭ بارلىق ازاماتتارىنىڭ 42% ونلاين فورماتتا ساناقتان ٶتكەن.
ول ساناقتىڭ تسيفرلىق فورماتىنا ەل حالقى وڭ قاباق تانىتتى دەپ سانايدى.
«ونلاين رەجيمدە وتباسىنان بٸر ادام بارلىق سۇراقتاردى تولتىردى. مەن دە ٶزٸم تولتىردىم. بار مەلٸمەت دايىن بولسا, ساناققا 15-20 مينۋت ۋاقىت كەتتٸ. قازاقستان ازاماتتارىنىڭ 42% ساناقتان ونلاين رەجيمدە ٶتكەنٸ بٸزدٸ قۋانتتى, قالعان ازاماتتارمەن ينتەرۆيۋەرلەر سٶيلەستٸ. وسىنداي ٷلكەن جۇمىستىڭ اتقارىلعانىنا قۋانىشتىمىز. بارلىق ەپيدەميولوگييالىق تالاپتاردى ساقتاۋ جەنە ۆاكتسينالاۋ بويىنشا تالاپتار جوعارى بولدى. ەرينە, قانداي دا بٸر مەسەلەلەر تۋىنداعانىن تٷسٸنەمٸز, ال جالپى حالىق ساناعى سەتتٸ ٶتتٸ دەپ ايتۋعا بولادى. سوڭعى نەتيجەلەر 2022 جىلدىڭ شٸلدەسٸندە شىعارىلادى. الدىن الا قورىتىندىنى جەلتوقسان ايىنىڭ سوڭىنا دەيٸن جارييا ەتەتٸن شىعارمىز», - دەپ تٷسٸندٸردٸ اگەنتتٸك تٶراعاسى.
