QR Strategiialyq josparlaý jáne reformalar agenttiginiń tóraǵasy Qairat Kelimbetov el boiynsha halyq sanaǵy qalai ótkenin aityp berdi, dep habarlaidy QazAqparat.
«Kez kelgen memleketke ulttyq statistika júiesi qajet, biz qansha azamatymyz bar ekenin, qyzmetimizdiń belgili bir bir aspektilerine qatysty jaǵdai qandai ekenin bilýimiz kerek. Sanaq on jylda bir ret júrgiziledi. Bul – BUU júiesi ustanatyn erejeler. Atap aitqanda, biz eýropalyq statistika biýrosymen tyǵyz jumys isteimiz. 10 jylda bir márte qolda bar derekterdi túzetý jáne rastaý júrgiziledi», - dedi Qairat Kelimbetov «Habar» telearnasyndaǵy «Ulttyq múdde» baǵdarlamasynda.
Agenttik basshysy halyq sanaǵy kúrdeli ýaqytta júrgizilgenin atap ótti.
«Sanaqty qazir ótkizý qajet pe ózi?» degen másele kóterildi. Bir jaǵynan, ony keiinge qaldyrý múmkin bolmady, ekinshi jaǵynan, suraqtar nege kóp degender de boldy. Orta eseppen 50 suraq boldy, biraq keibir baǵyttar boiynsha júzge jetti. Árine, syn boldy, bizdiń kez kelgen memlekettik naýqanymyz halyqtyń ekiudai sezimin týdyrady», - dedi Q. Kelimbetov.
Onyń aitýynsha, Qazaqstannyń barlyq azamattarynyń 42% onlain formatta sanaqtan ótken.
Ol sanaqtyń tsifrlyq formatyna el halqy oń qabaq tanytty dep sanaidy.
«Onlain rejimde otbasynan bir adam barlyq suraqtardy toltyrdy. Men de ózim toltyrdym. Bar málimet daiyn bolsa, sanaqqa 15-20 minýt ýaqyt ketti. Qazaqstan azamattarynyń 42% sanaqtan onlain rejimde ótkeni bizdi qýantty, qalǵan azamattarmen interviýerler sóilesti. Osyndai úlken jumystyń atqarylǵanyna qýanyshtymyz. Barlyq epidemiologiialyq talaptardy saqtaý jáne vaktsinalaý boiynsha talaptar joǵary boldy. Árine, qandai da bir máseleler týyndaǵanyn túsinemiz, al jalpy halyq sanaǵy sátti ótti dep aitýǵa bolady. Sońǵy nátijeler 2022 jyldyń shildesinde shyǵarylady. Aldyn ala qorytyndyny jeltoqsan aiynyń sońyna deiin jariia etetin shyǵarmyz», - dep túsindirdi agenttik tóraǵasy.
