فوتو: كونستيتۋتسييالىق سوت باسپاسٶز قىزمەتٸ
پرەزيدەنتتٸڭ قۇقىقتىق مەسەلەلەر جٶنٸندەگٸ كٶمەكشٸسٸ ەرجان جيەنباەۆ قازاقستاننىڭ حالىق كەڭەسٸ قازاقستان حالقى اسسامبلەياسى مەن ۇلتتىق قۇرىلتايدىڭ ستراتەگييالىق فۋنكتسييالارىن ورىنداۋدى جالعاستىراتىنىن ايتتى, دەپ حابارلايدى Ult.kz.
"ۇلتتىق قۇرىلتايدىڭ بەسٸنشٸ وتىرىسىندا مەملەكەت باسشىسى «بٸرنەشە جىل بويى مۇقييات قالىپتاستىرىپ كەلە جاتقان ساياسي قۇرىلىمنىڭ ٷيلەسٸمدٸ تٷيٸنٸ» رەتٸندە تاريحي ەرٸ ماڭىزدى ۇسىنىس ايتتى. پرەزيدەنت بٸرقاتار ەلدەردە بار ۆيتسە-پرەزيدەنت ينستيتۋتىن ەنگٸزۋدٸ ۇسىندى. مەملەكەت باسشىسىنىڭ ٶزٸ اتاپ ٶتكەندەي, «بٸزدٸڭ جاعدايىمىزدا بۇل لاۋازىمدى ەنگٸزۋ مەملەكەتتٸ باسقارۋ پروتسەسٸن تۇراقتاندىرادى. سونداي-اق بيلٸك يەرارحيياسىن بٸرجولا ايقىنداپ بەرەدٸ». سونىمەن قاتار رەفورمالاردىڭ جاڭا كەزەڭٸندە قوعام دامۋىنىڭ بارلىق مەسەلەسٸنە قاتىستى تۇراقتى جالپىۇلتتىق ديالوگ جٷرگٸزۋ ٷشٸن اۋقىمدى پلاتفورما رەتٸندە قازاقستاننىڭ حالىق كەڭەسٸن قۇرۋ ۇسىنىلدى. اتالعان ورگان حالقىمىزدىڭ ىنتىماق-بٸرلٸگٸن نىعايتۋعا ىقپال ەتەتٸن نەگٸزگٸ قوعامدىق-ساياسي بٸرلەستٸكتەر مەن قۇرىلىمداردى قوسىپ, قازاقستان حالقى اسسامبلەياسى مەن ۇلتتىق قۇرىلتايدىڭ ستراتەگييالىق فۋنكتسييالارىن ورىنداۋدى جالعاستىرادى. وسى ەكٸ ماڭىزدى ينستيتۋت بويىنشا نەگٸزگٸ ەرەجەلەر كونستيتۋتسييا دەڭگەيٸندە تيٸستٸ رەگلامەنتتەۋدٸ تالاپ ەتەدٸ", - دەدٸ جيەنباەۆ بايانداماسىندا.
