رەسەيگە سالىنعان سانكتسييا قازاقستانعا تاۋار جەتكٸزۋ مەسەلەسٸنە ەسەر ەتپەيدٸ. بەسەكەلەستٸكتٸ قورعاۋ جەنە دامىتۋ اگەنتتٸگٸنٸڭ تٶراعاسى سەرٸك جۇمانعاريننٸڭ ايتۋىنشا, كەرٸسٸنشە رەسەيلٸك تاۋار باعاسى تٶمەندەۋٸ مٷمكٸن, - دەپ حابارلايدى Tengrinews.kz.
"بٸرٸنشٸدەن, ەشكٸم تاۋار تاسىمالىن توقتاتقان جوق. كەپٸلدٸك بەرەمٸن. قازاقستانعا ەشقانداي سانكتسييا سالىنبايدى. ەرينە, لوگيستيكالىق جاعىنان پروبلەمالار بار. ولارعا 2020 جىلى ناۋرىزدا باستالعان پاندەمييادان بەرٸ ٷيرەنۋٸمٸز كەرەك ەدٸ. سوندىقتان لوگيستيكالىق جاعىنان مەسەلە ٶزگەرۋٸ مٷمكٸن. قازٸر بٸرٸنشٸ كەزەكتە وسى جٷيە بويىنشا جۇمىس ٸستەلٸپ جاتىر", - دەپ تٷسٸندٸردٸ جۇمانعارين مەجٸلٸس اياسىندا جۋرناليستەردٸڭ سۇراقتارىنا جاۋاپ بەرٸپ.
سونىمەن قاتار, ول رەسەيگە قاتىستى سانكتسييالارعا بايلانىستى قازاقستاندا رەسەيلٸك تاۋار ارزانداۋى مٷمكٸن ەكەنٸن ايتتى.
"سانكتسييا كەزٸندە كەيبٸر تاۋار تٷرٸ ارزانداۋى دا مٷمكٸن. ٶيتكەنٸ رەسەي ٷشٸن ەكسپورتتايتىن مەملەكەتپٸز. رەسەيمەن اراداعى سىرتقى ساۋدا اينالىمى 40 پايىزعا جۋىق بولادى. بۇل بٸر جاعىنان جاقسى, بٸراق سانكتسيياعا بايلانىستى كەرٸ تۇستارى دا بار. دەگەنمەن بۇل مەسەلەدە تاۋار كٶلەمٸ تٶمەندەمەيدٸ", - دەپ قوستى ول.
بەسەكەلەستٸكتٸ قورعاۋ جەنە دامىتۋ اگەنتتٸگٸ تٶراعاسىنىڭ ايتۋىنشا, بۇل - باعام ايىرماشىلىعىنا بايلانىستى بولاتىن تابيعي پروتسەسس.
"بٸرنەشە رەت ايتتىم, ەلەۋمەتتٸك ماڭىزى بار تاۋارلاردىڭ 19 تٷرٸنٸڭ جارتىسى بويىنشا يمپورتقا تەۋەلدٸمٸز. قازٸر جالعىز سۇراق باعام ايىرماشىلىعىنا بايلانىستى بولىپ وتىر. بٸراق بۇل - تابيعي پروتسەسس. ٸشكٸ ٶندٸرٸستٸ دامىتۋ قاجەت. بۇل - سالالىق مينيسترلٸكتەرگە قاتىستى مەسەلە", - دەپ تٷيٸندەدٸ سەرٸك جۇمانعارين.
