"زيمنيايا ۆيشنيا" ويىن-ساۋىق ساۋدا ورتالىعى ٶرتەنٸپ, بٸرنەشە ادام قازا تاپقاننان كەيٸن كەمەروۆو تۇرعىندارى الاڭعا شىعىپ, ميتينگ ٶتكٸزٸپ جاتىر. حالىق گۋبەرناتور امان تٶلەەۆتٸڭ وتستاۆكاسىن تالاپ ەتۋدە.
"كەمەروۆو قالاسىندا ميتينگ. شامامەن 4 مىڭ ادام ەكٸمشٸلٸك عيماراتىنىڭ ماڭىنا جينالىپ, امان تٶلەەۆتٸڭ وتستاۆكاعا كەتۋٸن تالاپ ەتٸپ جاتىر. جينالعان حالىقتىڭ اراسىندا ٶرتتەن قازا تاپقانداردىڭ تۋىستارى دا بار", - دەپ جازىلعان Mash Telegram-كانالىندا.
"نگس.نوۆوستي" پورتالى بولسا ميتينگتٸڭ سوۆەت الاڭىندا ٶتٸپ جاتقانىن جازدى. جينالعان تۇرعىندار مارقۇم بولعانداردى ازا تۇتىپ, وقيعادان كەيٸنگٸ ويلارىمەن بٶلٸسۋدە. حالىق الدىنا قالا مەرٸ يليا سەرديۋك شىعىپ باسۋ ايتقان. دەگەنمەن, تۇرعىندار ونىڭ دا قىزمەتتەن كەتۋٸن تالاپ ەتٸپ, سٶزٸن تىڭداۋدان باس تارتىپتى.
ايتا كەتەيٸك, رەسەي پرەزيدەنتٸ ۆلاديمير پۋتين دە قازٸرگٸ ۋاقىتتا كەمەروۆتە. وسىعان دەيٸن رەسەي پرەزيدەنتٸ كەمەروۆتەگٸ 64 ادامنىڭ ٶلٸمٸنە ەكەپ سوققان "زيمنيايا ۆيشنيا" ساۋدا ٷيٸندە بولعان ٶرتتٸڭ نەدەن شىققانىنا قاتىستى پٸكٸر بٸلدٸرگەن بولاتىن.
"بٸزدە نە بولىپ جاتىر, بۇل ەسكەري قاقتىعىس ەمەس, كەن ورنىنداعى مەتاننىڭ شىعىپ كەتۋٸ ەمەس قوي. ادامدار دەمالۋعا كەلدٸ, بالالار. دەموگرافييا تۋرالى ايتىپ, وسىنشا ادامدى نەگە جوعالتىپ وتىرمىز? بۇل قىلمىستىق سالعىرتتىقتان, بوس بەلبەۋلٸكتەن بولدى", - دەگەن ەدٸ پۋتين ٶرت سالدارىن جويۋعا ارنالعان كەمەروۆتەگٸ جيىن بارىسىندا.
ەسكە سالا كەتەيٸك, 25 ناۋرىزدا بولعان تٶتەنشە جاعدايدان كەيٸن 64 ادامنىڭ قازا تاپقانى, ولاردىڭ ٸشٸندە كەم دەگەنٸ سەگٸزٸ بالا ەكەنٸ حابارلانعان ەدٸ. Cونداي-اق, اۋرۋحانالاردا تٶتەنشە جاعدايدان زارداپ شەككەن 13 ادامنىڭ جاتقانى ايتىلعان بولاتىن. كەيٸننەن تاعى 50 ادام مەديتسينالىق كٶمەككە جٷگٸنگەن.
