قازiرگi قارتتاردىڭ جاستارعا ٷيرەتەرi جوق...

ٶتكەن دەمالىستا الماتىدا بiرگە وقىعان كۋرستاس دوسىم قايتىس بولىپ, سونىڭ قوناقاسىنا بارىپ قايتتىم. قازاقىلىعى باسىم, جارقىن جٷزدi ازامات بولاتىن, جانى جانناتتا بولسىن. مەنiڭ ايتايىن دەگەنiم – دوسىم جايلى ەمەس, دوسىمنىڭ قوناقاسىنا جينالعان شالا قازاق اعايىندار تۋرالى بولماق.

مەن اتىراۋدا, ول الماتىدا بولعاندىقتان ارا-تۇرا كەزدەسكەنiمiز بولماسا, تەك تەلەفونمەن حابارلاسىپ تۇراتىنبىز. سول سەبەپتi دە قوناقاسىنا جينالعان كٶپشiلiكتiڭ كٶبiسiن تاني المادىم. داستارقان باسىنا وتىرعىزعاندا مەنi اقساقالدى اتالار مەن اق سامايلى اپالارىمىزدىڭ قاسىنا جايعاستىردى (ٶزiم دە جاس ەمەسپiن, 50-دەن اسىپ بارام). بارلىعى كٷبiر-كٷبiر ەڭگiمە ايتىپ وتىر. تٷر-ەلپەتتەرiنە قاراسام, كەدiمگi قازاقتىڭ اتا-ەجەلەرi. بiراق ايتىپ وتىرعان سٶزدەرiن ەستiگەندە قۇددى بiر ورىستىڭ شالدارى مەن كەمپiرلەرiنiڭ اراسىنا كiرiپ كەتكەندەي بولدىم. 

كiلەڭ قازاق وتىرىپ, بارلىعى بiر-بiرiمەن ورىسشا حال سۇراسۋدا. الماتىنىڭ جاستارى ورىسشاعا بەيiم دەپ ەستيتiنمiن, بiراق ٷلكەن كiسiلەر قازاقشا سٶيلەيتiن شىعار دەپ ويلاعانمىن. سٶيتسەم, جاسى دا, كەرiسi دە ورىسشا سٶيلەۋگە ەۋەس ەكەن. ول ازداي بiر-بiرiنەن “نەگە قۇران وقىماي جاتىر?” دەپ سۇراپ قويادى. ارالارىنداعى بiر كiسiنiڭ “قازiر وقىمايتىن بولسا, مارقۇم جايلى بiر-ەكi اۋىز سٶز ايتايىن” دەگەنiنە نە دەرسiز?! سوندا ادامنىڭ جانازاسى شىعارىلماي جاتىپ, قۇران وقىلمايتىنىن “اتا-اپا” دەپ سىيلاپ جٷرگەن قارييالارىمىزدىڭ بiلمەگەنi مە?! ورنىمنان اتىپ تۇرىپ, “نە ايتىپ, نە شٷلدiرلەپ وتىرسىزدار?” دەپ ايقاي سالۋعا شاق قالدىم. ٶزiمدi ەزەر ۇستادىم. 

جالپى, بiزدiڭ ٶلكەدە قازاقىلىق الماتىعا قاراعاندا جاقسى ساقتالعان ەكەن. اتىراۋدا جٷرiپ مۇنداي جاعدايعا بiردە-بiر رەت تاپ بولماپپىن. بiراق ەلiمiزدiڭ وڭتٷستiك استاناسىنىڭ جاستارى تٷگiلi, قارتتارىنىڭ مەڭگٷرتتiككە بوي الدىرعانىن كٶرiپ, قاتتى قاپالاندىم.

بۇرىن قارييالارىمىز جاستارعا ٷلگi بولىپ, اقىل ايتىپ, جاستارعا بiلەتiندەرiن ٷيرەتiپ وتىراتىن ەدi. ال داستارقان باسىنداعى اتالارىمنىڭ ەڭگiمەسiنە قاراپ وتىرىپ: “مىنا تٷرلەرiمەن قازiرگi قارييالار جاستارعا نە ٷيرەتەدi?” دەگەن ٷلكەن سۇراق ويىما كەلدi. راسىمەن, اقساقالدارىمىز تىم ۇساقتالىپ كەتكەن سيياقتى. “بiزدە شالدار كٶپ, بiراق اقساقال جوق” دەگەن سٶزدiڭ جانى بار ەكەن.

ابىلعازى قۇرمانبەك,
اتىراۋ قالاسى

"جاس الاش" گازەتٸ