بٷگٸن مەملەكەت باسشىسى قاسىم-جومارت توقاەۆتىڭ قاتىسۋىمەن «قازاقستاننىڭ 100 جاڭا ەسٸمٸ» جوباسىنىڭ جەڭٸمپازدارىنىڭ ونلاين فورماتتاعى كەزدەسۋٸ ٶتتٸ.
پرەزيدەنت جوبا جەڭٸمپازدارىن قۇتتىقتاپ, ولاردىڭ ٶز دارىنىمەن, سونداي-اق بٸلٸمٸمەن كٶپشٸلٸكتٸ مويىنداتا بٸلگەنٸن, مەملەكەتٸمٸزدٸ ٶركەندەتۋگە ايىرىقشا ٷلەس قوسىپ كەلە جاتقانىن ايتتى. مەملەكەت باسشىسى تەرەڭ بٸلٸمٸن وزىق تەجٸريبەمەن ۇشتاستىرا بٸلگەن ازاماتتاردىڭ ەلٸمٸزدٸ العا جەتەلەيتٸنٸنە سەنٸمدٸ. قاسىم-جومارت كەمەلۇلى تەۋەلسٸزدٸك كەزەڭٸندە ٶسٸپ جەتٸلگەن بۋىننىڭ قارىم-قابٸلەتٸن جوعارى باعالادى.
سٶزسٸز, ولار - بٸزدٸڭ حالقىمىزدىڭ ماقتانىشتارى ھەم ٶزگە ەلدەر قازاقستاندى وسى ازاماتتار ارقىلى تانىپ, باعالايتىنى بەلگٸلٸ.
وسى ۋاقىتقا دەيٸن دەستٷرلٸ تٷردە ٶتكٸزٸلٸپ كەلە جاتقان «قازاقستاننىڭ 100 جاڭا ەسٸمٸ» جوباسىنا 7,5 مىڭ ادام قاتىسىپ, ەلٸمٸز تالاي تالانتتى, تالاپتى وتانداستارىنىڭ اتىن تانىدى.
ولاردىڭ اراسىندا تەلٸم-تەربيەنٸڭ جٷگٸن كٶتەرگەن ۇستاز دا, اق حالاتتى ابزال جان دا, مەملەكەت اتىن مەشھٷر قىلعان سپورتشى دا, ەيگٸلٸ مۋزىكانت پەن دارىندى اقىن دا, ەڭبەكقور مامان يەسٸ مەن جان-جاقتى ەدەبيەتشٸ دە, ٸزدەنٸمپاز عالىم مەن تابىستى كەسٸپكەر دە بار.
وسى ورايدا, ۇلت پورتالى ەل اۋزىندا جٷرگەن ايتۋلى جوبانىڭ بيىلعى قاتىسۋشىلارىنىڭ كەيبٸرٸن وقىرمان قاۋىمعا تانىستىرىپ, پٸكٸرلەرٸن ۇسىنعاندى جٶن سانايدى.
شىعىس قازاقستان وبلىسى ٷرجار اۋدانىندا ۇستاز بولىپ قىزمەت اتقارىپ جٷرگەن احات جەڭٸسٸمنٸڭ دە, جوبامنىڭ دا اۆتورى ھەم قولداۋشىسى حالىق دەيدٸ. ول – مەكتەپتە گرافيكا جەنە جوبالاۋ پەنٸنەن مۇعالٸم.
ٷرجار اۋدانىنىڭ كٶكتال اۋىلىنا سالىنعان كٶپٸر - كەزٸندە جاپوندىقتار سەمەي قالاسىنا سالعان اسپالى كٶپٸردٸڭ ون ەسە كٸشٸ نۇسقاسى.
«اۋىلىمىزدا قاتىنسۋ دەگەن ٶزەن اعادى. كٶكتەمدە تاسىعاندا, اتتى كٸسٸ ٶتە المايدى. سۋ تارتىلدى-اۋ دەگەن جازدىڭ ٶزٸندە مال تٷگەندەۋگە, شابىندىقتى شٶمەلەلەۋگە دەگەن سەكٸلدٸ جۇمىستارعا اۋىل حالقى بارا الماي قالادى. بالىقشىلار كٷزگٸ سۋىقتا سۋدى كەشٸپ ٶتٸپ جٷرەتٸن», - دەيدٸ احات راقىشەۆ.
سول كەزدە كٶكتالدىقتار «كٶپٸر بولسا, شٸركٸن» دەپ ارماندايتىن كٶرٸنەدٸ.
«نەگٸزگٸ ماماندىعىم – مۇعالٸم. اۋىلعا كٶپٸر سالۋ كەرەكتٸگٸ تالايدان بەرٸ ايتىلىپ جٷرگەن. وسىلايشا كٶپتٸڭ كٶكەيٸندە جٷرگەن مەسەلەنٸ شەشۋ ٷشٸن سىنىپتاستار بٸرٸگٸپ, سول كٶپٸردٸ سالىپ بەرۋ يدەياسى كەلدٸ. سودان سىنىپتاستارىمىزبەن مەكتەپ بٸتٸرگەنٸمٸزگە 20 جىل بولعانىن ەرەكشە بٸر ٸسپەن ەستە قالدىرساق دەپ كەلٸستٸك. 30 جىل بۇرىنعى تٷلەكتەر دە وسى يدەياعا اتسالىستى. كٶپٸر قۇرىلىسىنا نەگٸزگٸ قاراجاتتى وسى ەكٸ توپ شىعاردى. حالىق تا قولىندا بارىمەن بٶلٸستٸ. ال مەن بالالارعا سىزۋ پەنٸنەن ساباق بەرەتٸن بولعاندىقتان, كٶپٸردٸڭ سىزباسىن جوبالاۋ ماعان جٷكتەلدٸ» - دەيدٸ ۇستاز.
ول العاشىندا بۇل باستاما قاراپايىم مۇقتاجدىقتان تۋىنداعانىن, وسى ارقىلى تانىمال بولساق دەگەن وي كٶزدەمەگەندەرٸن ايتادى.
«اۋىلدا بولعاندىقتان, قۇرىلىستىڭ باسى-قاسىندا ٷنەمٸ جٷرۋٸمە تۋرا كەلدٸ. سوندىقتان, «100 جاڭا ەسٸمگە» ورتالارىنان مەنٸ شىعارعان بولار. ەۋ باستا بۇل ٸس ارقىلى ەلەۋمەتتٸك جەلٸنٸ شۋلاتىپ, تانىمال بولايىق دەپ ويلاعان جوقپىز. جاي عانا اۋىلدىڭ بٸر مۇقتاجدىعىن ٶتەۋ كەرەك بولدى.
بۇل ٸستە ٶزٸمٸزدٸڭ اۋىلدىڭ ەكٸمٸ جاقسى قولداۋ بٸلدٸردٸ. قازٸر كٶپٸر ەل يگٸلٸگٸنە جۇمىس ٸستەپ تۇر. ەندٸ سونىڭ قۇجاتىن زاڭداستىرىپ, قاۋٸپسٸز قىزمەت كٶرسەتۋٸن پىسىقتاپ جاتىرمىز.
بۇل جوباعا اتسالىسقان ەربٸر اۋىلداسىم «100 جاڭا ەسٸم» جەڭٸمپازى اتانۋعا لايىق. بۇل بايقاۋداعى مەنٸڭ جەڭٸسٸم – بٷكٸل اۋىلىمنىڭ جەڭٸسٸ», - دەيدٸ احات راقىشەۆ.
«قازاقستاننىڭ 100 جاڭا ەسٸمٸ» جوباسىنىڭ بيىلعى جەڭٸمپازدارىنىڭ اراسىندا جاس مۋزىكانت ارىستان ەبٸلدين دە بار. 18 جاستاعى تالانت يەسٸ ەلەۋمەتتٸك جەلٸ ارقىلى قازاقستاندىق جاستار اراسىندا تانىمال بولدى.
ول جازعان كاۆەر ەلەمدٸك Shazam-عا ٸلٸككەن ەدٸ. سونىمەن قاتار, ارىستان - اتاقتى رەپەر Jah Khalib ۇيىمداستىرعان مۋزىكالىق بايقاۋدىڭ جەڭٸمپازى.
«مەن مۋزىكامەن بالا كەزٸمنەن اينالىسامىن. بەس جاسىنان باستاپ فورتەپيانو مەن باراباندا ويناي باستادىم. ەكەم دەرەۋ مۋزىكا مەكتەبٸنە بەردٸ. اتا-انالارىم دا مۋزىكانت. سوندىقتان ٶمٸرٸمدٸ شىعارماشىلىقپەن بايلانىستىرۋ زاڭدىلىق شىعار دەپ ويلايمىن. العاشقى اۆتورلىق ەنٸمدٸ سٷيٸكتٸ قىزىما ارناعان بولاتىنمىن. ونى ەلەۋمەتتٸك جەلٸ قولدانۋشىلارى جوعارى باعالاپ, مۋزىكامەن تٷبەگەيلٸ اينلىسۋىما جٸگەر بەردٸ. بۇل مەنٸ جاڭا شەدەۆرلەر جاساۋعا شابىتتاندىردى», - دەدٸ جاس مۋزىكانت قازاقپارات اگەنتتٸگٸنە بەرگەن سۇحباتىندا.
قازٸر ارىستان ەبٸلدين مۋزىكا سالاسىنداعى تانىمال وتاندىق كومپانييامەن كەلٸسٸمشارت اياسىندا جۇمىس ٸستەپ جٷر.
«جاقىندا ەرٸپتەستٸك كەلٸسٸمشارت جاساستىق. مەن وسىنداي ەرەكشە مٷمكٸندٸك العانىما ٶتە قۋانىشتىمىن. بٸزدٸڭ كومپانييا ەرٸپتەستٸك ورناتقان رەسەيلٸك بٸرلەستٸك يۆان دورن, زيۆەرت, فيليپ كيركوروۆ سيياقتى تانىمال ورىنداۋشىلارمەن جۇمىس ٸستەيدٸ. وسى مٷمكٸندٸكتٸ پايدالانىپ كٶپتەگەن جاڭا حيتتەر شىعارامىز دەپ ٷمٸتتەنەمٸن», - دەيدٸ مۋزىكانت.
ەڭگٸمە بارىسىندا ول Jah Khalib ۇيىمداستىرعان مۋزىكالىق بايقاۋداعى جەڭٸسٸنە توقتالدى.
«شىنىمدى ايتسام, مەن جەڭەمٸن دەپ ويلاعان جوق ەدٸم. داۋىس بەرۋ قورىتىندىسى بويىنشا ەڭ كٶپ بالل جيناپپىن. وسىلايشا اۆتورلىق كونكۋرستا جەڭٸسكە جەتتٸم», - دەيدٸ ارىستان.
ونىڭ ارمانى – ەلەمدٸك ساحنالاردا ەن سالىپ, شىعارماشىلىق يەسٸنە اينالۋ.
«مەن «100 جاڭا ەسٸم جوباسىندا» جەڭٸمپازداردىڭ اراسىندا بولعانىما ٶتە قۋانىشتىمىن. بۇل -مەن ٷشٸن جاڭا قادام. ەرينە, بۇل مەنٸڭ جەكە دامۋىما ەسەر ەتەدٸ جەنە جاڭا شىعارماشىلىق شىڭداردى باعىندىرۋعا ىقپال ەتەدٸ», - دەپ اعىنان جارىلدى ارىستان ەبٸلدين.
ال, 23 جاستاعى سەرٸكجان قاجىتايدى ەدەبيەتكە دەگەن شىنايى ٸڭكەرلٸك پەن تاباندىلىعى «قازاقستاننىڭ 100 جاڭا ەسٸمٸ» جوباسىنىڭ جەڭٸمپازى ەتكەنٸ انىق.
شىعىس قازاقستان وبلىسىنىڭ ٷرجار اۋدانىندا ەكٸمدٸك قىزمەتكەرٸ بولىپ جۇمىس ٸستەيتٸن سەرٸكجان قولى بوساعاندا ەدەبي اۋدارمامەن اينالىسادى. ونىڭ بۇل جولعا تٷسۋٸنە ابايدى يسپان تٸلٸندە سٶيلەتكەن اتاقتى اقىن حورحە پادرونمەن كەزدەسۋ ەسەر ەتٸپتٸ.
«نەگٸزگٸ ماماندىعىم – قازاق جەنە ورىس تٸلدەرٸنٸڭ مۇعالٸمٸ. بٸراق قازٸر ٷرجار اۋداندىق ەكٸمدٸگٸنٸڭ قوعامدىق كەلٸسٸم ورتالىعىندا جەتەكشٸ مامان بولىپ جۇمىس ٸستەيمٸن. بالا كەزٸمنەن ەدەبيەتكە ەۋەس بولدىم. كەيٸن تٸلگە دەگەن قىزىعۋشىلىق پايدا بولدى. ال ەدەبيەتتٸ جانىمنىڭ سەرٸگٸ ەتۋگە 2019 جىلى نۇر-سۇلتاندا ٶتكەن ەۋرازييا قالامگەرلەرٸنٸڭ بٸرٸنشٸ فورۋمى ىقپال ەتتٸ. ول كەزدە مەن جازۋشىلار وداعىنىڭ ەلورداداعى قالالىق فيليالىندا جۇمىس ٸستەپ جٷرگەن ەدٸم. ەلگٸ فورۋمدا ابايدى اۋدارعان يسپاننىڭ ۇلى اقىنى حورحە پادرون مىرزامەن تانىستىم. شالا-پۇلا اعىلشىنشاممەن سٶيلەسكەننٸڭ ٶزٸندە تٷسٸنٸسٸپ كەتتٸك. ول كٸسٸنٸڭ ەر ٸسٸنەن ەدەبيەتكە دەگەن ماحابباتتى, ابايعا دەگەن قۇرمەتتٸ كٶردٸم. سول كەزدە مەندە وي پايدا بولدى. قازاقتىڭ تالانتتى قالامگەرلەرٸن ەلەمگە تانىتۋ ٷشٸن ٶز ارامىزدان تٸل بٸلەتٸن, ەدەبيەتكە جانى اشيتىن ادام شىقپاي, تٶل ەدەبيەتٸمٸزدٸڭ رۋحى مەن فيلوسوفيياسىن ٶزگەگە تانىتۋ مٷمكٸن ەمەس ەكەنٸن تٷسٸندٸم», - دەيدٸ ەۋەسقوي ەدەبيەتشٸ.
ارمانىن ورىنداۋ ٷشٸن تالاپتى جاس ەۋەلٸ تٸل ٷيرەنٸپ, اعىلشىنشا بٸلٸمٸن جەتٸلدٸرٸپتٸ.
«قازٸرگە دەيٸن ٷيرەنٸپ جٷرمٸن دەسەم بولادى. بٷگٸنگە دەيٸن 7 كٸتاپ اۋداردىم. ونىڭ ٸشٸندە كادزۋو يسيگۋرونىڭ «جوعالتىپ الما سەن مەنٸ» دەگەن شىعارماسىن اۋدارعان كٸتابىم «فوليانت» باسپاسىنان باسىلىپ شىقتى. قالعاندارى ينتەرنەت رەسۋرستاردا تۇر. تۋۆە يانسسوننىڭ «مۋمي-ترولل» شىعارماسى جاقسى وقىلىپ جاتىر. ەلەم حالىقتارىنىڭ ەرتەگٸلەرٸن, رەي برەدبەريدٸڭ «بەستەسەيٸك» ەڭگٸمەلەر جيناعىن اۋدارىپ شىقتىم. الداعى ۋاقىتتى وسىنىڭ بەرٸنٸڭ باسىن بٸرٸكتٸرٸپ, ٷلكەن بٸر كٸتاپ ەتٸپ شىعارسام دەپ ويلايمىن», - دەيدٸ اۋدارماشى.
جاس ەدەبيەتشٸ قازاق تٸلٸنە تەك شىن تالانتتار عانا اۋدارىلۋ كەرەك دەپ سانايدى.
«ەلەمگە بەينە بٸر سىرتتان قاراپ تۇرعانداي تانىممەن جازاتىن جازۋشىلار بولادى. كٶبٸنە سونداي اۆتورلاردى تاۋىپ اۋدارۋعا تىرىسامىن. مىسالى, رەي برەدبەريدٸڭ ەڭگٸمەلەرٸنٸڭ ٶزٸ تۇتاستاي امەريكا ەدەبيەتٸن جاڭا دەڭگەيگە شىعاردى دەر ەدٸم. ٶيتكەنٸ ونىڭ ٸزٸنەن ٷلكەن ەدەبي اعىم پايدا بولدى. سونداي ادامداردى تاڭداۋعا تىرىسامىن.», - دەيدٸ «100 جاڭا ەسٸم» جەڭٸمپازى.
وعان سالسا, قازاق ەدەبيەتٸنٸڭ بارلىق كلاسسيكتەرٸن ەلەم تٸلدەرٸنە اۋدارىپ شىقسا دا, ارتىق بولماس ەدٸ.
«قازاق ەدەبيەتٸندەگٸ كلاسسيكتەردٸڭ بەرٸ ەلەم كٸتاپحانالارىندا تۇرۋعا لايىق. ورالحان بٶكەي, مۇحتار ماعاۋين سيياقتى بٸرنەشە تٸلگە اۋدارىلعاندارى بار. بٸراق سونىڭ بەرٸ جاڭا بٸر دەڭگەيمەن, جاڭا بٸر تالاپپەن اۋدارلىسا دەگەن ارمان بار. بٸرٸككەن ۇلتتار ۇيىمىنىڭ ەڭ تانىمال تٸلدەرٸنە ەڭ مىقتى اۆتورلارىمىزدى ساپالى ەتٸپ اۋدارساق, بۇرىنعى اۋدارىلعاندارىن دا قايتادان قاراپ شىقساق دەپ ويلايمىن. مىسالى سايىن مۇراتبەكوۆتىڭ «جۋسان يسٸ» شىعارماسىنىڭ اۋدارماسى قازاقي تانىمدى, اۆتوردىڭ مەسسەدجٸن جەتكٸزە الماعانداي بولىپ كٶرٸندٸ. قازاق اۆتورلارىن تٸل بٸلەتٸن قازاقتار اۋدارۋ كەرەك دەپ وتىرعانىم وسى», - دەيدٸ سەرٸكجان.
ول ايتىپ وتىرعان ەۋرازييا قالامگەرلەرٸنٸڭ استاناداعى فورۋمىندا ەدەبي اگەنتتەر ارقىلى قازاق اۆتورلارىن ەلەمگە شىعارۋ تۋرالى يدەيا العاش رەت ايتىلعان بولاتىن. سول يدەيادان شابىت العان سەرٸكجان قاجىتاي دوسىمەن بٸرگە اگەنتتٸك قۇراعانىن ايتادى.
«اعىلشىن, يسپان, فرانتسۋز تٸلٸن جاقسى بٸلەتٸن قازاقتار بار. سولاردىڭ باسىن بٸرٸكتٸرسەك دەگەن نيەتپەن بەكزات رىسبەكۇلى دەگەن دوسىم ەكەۋمٸز ەدەبي اگەنتتٸك قۇرعان بولاتىنبىز. ەزٸرگە زاڭ بويىنشا تٸركەپ, قۇجاتىن رەسٸمدەگەن جوقپىز. قازٸر ەلەمگە تانىمال اۆتورلاردىڭ مەنەدجمەنت پەن ماركەتينگتٸ قالاي پايدالانعانىن زەردەلەپ جاتىرمىز. جالپى ۇلى كلاسسيەكتەردٸ اۋدارما ارقىلى قالاي تانىمال ەتۋگە بولاتىنىن زەرتتەپ جاتىرمىز. مامىر ايىندا ول تالداۋدى قورىتىندىلايمىز. وسىدان كەيٸن قۇجاتىن پىسىقتاپ, ينۆەستور ٸزدەيتٸن شىعارمىز», - دەيدٸ جوبا جەڭٸمپازى.
جوبا جەڭٸمپازدارىنىڭ قاتارىندا «كولوس فەرما» جشس ديرەكتورى يننا كورنەەۆانى دا ەرەك اتاپ ٶتكەن جٶن.
ول مال تۇقىمىن اسىلداندىرۋمەن اينالىساتىن شارۋاشىلىق كەشەنٸن باسقارادى. جۇمىستان قولى قالت ەتكەندە مەتسەناتتىق جوبالارىمەن قوستاناي وبلىسىنداعى دەنيسوۆ اۋدانى مەن سۆەردلوۆ اۋىلدىق وكرۋگٸنٸڭ دامۋىنا ٷلەس قوسىپ جٷر.
«كولوس فەرما» جشس اسىل تۇقىمدى ابەردين-انگۋس سيىرىن ٶسٸرۋمەن اينالىسادى. 2019-2020 جىلدارى ەستونييادان 330 ٸرٸ قارا ساتىپ ەكەلدٸك. بٸز ٶسٸمدٸك شارۋاشىلىعىمەن دە اينالىسامىز. ۇيىمنىڭ نەگٸزٸن قايىن اتام كورنەەۆ الەكساندر اناتولەۆيچ قالاعان بولاتىن. قازٸر وتباسىلىق شارۋاشىلىقتى دامىتۋ مەنٸڭ موينىما كٶشتٸ. بولاشاقتا ۇلىم ەكەسٸ مەن اتاسىنىڭ جولىن جالعاستىرادى. كەنتتەگٸ نەگٸزگٸ جۇمىس بەرۋشٸ كەسٸپورىنبىز, شامامەن 125 جۇمىسشى بار. بٸز جاڭا تەحنولوگييالاردى جاسقانباي ەنگٸزۋدٸڭ ارقاسىندا ٶركەندەپ كەلەمٸز» - دەدٸ يننا كورنەەۆا اگەنتتٸك تٸلشٸسٸنە بەرگەن سۇحباتىندا.
«100 جاڭا ەسٸم» جوباسىنا ونىڭ كانديداتۋراسىن جەرگٸلٸكتٸ ەكٸمدٸك ۇسىنعان ەكەن. 2019 جىلى اۋىلعا ستاديون سالىپ, سپارتاكيادا ٶتكٸزگەن ەڭبەگٸن ەسكەرسە كەرەك. ەندٸ وسى تۋرنيردٸ الەكساندر كورنەەۆتٸ ەسكە الاتىن دەستٷرلٸ شارا ەتپەكشٸ.
«اۋىلىمىزدا سپورتتى دامىتسام دەيمٸن. سول ٷشٸن كٸشكەنتاي بالالاردى سپورتقا باۋليتىن باپكەر العىزدىق. اۋىلدا بالالار از. سوعان قاراماستان, جارتى جىلدىڭ ٸشٸندە اۋداندىق جارىستاردا توپ جارا باستادىق. سپورتتى دامىتۋ ارقىلى جاستاردىڭ وسىندا تۇراقتاپ قالعانىن كٶزدەپ وتىرمىن. بۇل جوبا اۋىلدا تۇرۋعا بولاتىنىن, اۋىلدا دامۋ كەرەكتٸگٸن كٶرسەتەدٸ دەپ ويلايمىن. ٶيتكەنٸ اۋىل –ەكونوميكانىڭ ماڭىزدى اجىراماس بٶلٸگٸ. اۋىل جويىلسا, ەكونوميكاعا قيىن بولادى. سوندىقتان مەن ٶز ٸسٸممەن اۋىلدا تۇرۋعا, دامۋعا, وي-ارمانداردى جٷزەگە اسىرۋعا بولاتىنىن دەلەلدەيمٸن», - دەدٸ «100 جاڭا ەسٸم» جەڭٸمپازى.
بٷگٸنگٸ كەزدەسۋدە جوبانىڭ ەربٸر قاتىسۋشىسىنا قاراتا ايتقان سٶزٸندە قاسىم-جومارت توقاەۆ ولاردىڭ جەتٸستٸگٸ قازاقستان تابىسىنىڭ كٶرٸنٸسٸ ەكەنٸن, ولار ٶزدەرٸنٸڭ پاتريوتتىق ەرەكەتٸ ارقىلى بارشا قازاقستاندىقتاردى ىنتالاندىراتىنىن اتاپ ٶتتٸ.
– سٸزدەردٸڭ جەتٸستٸكتەرٸڭٸز كەز-كەلگەن ستاتيستيكادان ارتىق. وسىناۋ كەرەمەت جوبا سٸزدەردٸ ودان ەرٸ دامۋعا ەرەكشە تالپىندىرىپ, قوعام مەن ەل يگٸلٸگٸ ٷشٸن جاڭا يدەيالاردى ٸسكە اسىرۋدىڭ كەڭ كٶكجيەكتەرٸن اشتى دەپ سەنەمٸن. ەلٸمٸز ٶزٸنٸڭ دارىندى جاستارىنىڭ كٶپتٸگٸمەن ماقتانا الادى جەنە ماقتانۋعا تيٸس. قازاقستاننىڭ بولاشاعى سٸزدەردەي پروگرەسسيۆتٸ, تالانتتى, پاتريوت جاستاردىڭ قولىندا. سٸزدەر مەملەكەتتٸڭ باسقارۋ تٸزگٸنٸن قولعا الۋعا دايىن بولۋلارىڭىز كەرەك. ال بٸز, ياعني اعا تولقىن, وسى ايتقان سٶزٸمٸزدٸڭ شىندىققا اينالۋى ٷشٸن بارلىعىن جاسايمىز, – دەدٸ پرەزيدەنت.
