"ۋرالسكايا نەدەليا" گازەتٸنٸڭ جۋرناليستەرٸ موبيليزاتسييادان ورالعا قاشقان رەسەيلٸكتەرمەن سۇحباتتاستى, - دەپ حابارلايدى Tengrinews.kz اگەنتتٸگٸ.
باسىلىم كەيٸپكەرلەرٸنٸڭ بٸرٸ - مەسكەۋدەن 18, 23 جەنە 26 جاستاعى ٷش ۇلىمەن كەلگەن شەشەن احمەد. ولار شەكارادان ٶتۋ ٷشٸن بٸرنەشە كٷن كٷتكەن, اۆتوبۋس جٷرگٸزۋشٸسٸنە تٶرتەۋٸ ٷشٸن 10 مىڭ رۋبل بەرگەن.
ەر ادامنىڭ ايتۋىنشا, ول قازاقستانعا كەلگەنٸنە قۋانىشتى.
"دەمالعان سوڭ, تٷركيياعا جول تارتامىز", - دەدٸ ول.
احمەت جامبىل (قازٸرگٸ تاراز) قالاسىندا دٷنيەگە كەلگەن. ول بٸر جاسقا تولعاندا اتا-اناسى شەشەنستانعا كٶشٸپ كەتتٸ. ونىڭ ايتۋىنشا, 24 اقپاندا پۋتين رەسەي ەسكەرٸنٸڭ ۋكرايناعا باسىپ كٸرەتٸنٸن جارييالاعاندا اۋىرىپ قالعان.
"مەن 24 اقپاننان بەرٸ جۇمىستا ەرٸپتەستەرٸمە بۇل سوعىستىڭ ابىرويسىز ەكەنٸن اشىق ايتىپ كەلەمٸن. ال اينالامداعى جاستارعا ايتارىم, سەندەر ساياساتقا قىزىعۋلارىڭ كەرەك, ساياساتكەرلەردٸڭ نە ٸستەپ جاتقانىن بٸلۋلەرٸڭ كەرەك. قازاقستانعا سوعىسقا قارسى پاسسيۆ وپپوزيتسييا كەلدٸ. ولار پۋتيننٸڭ ساياساتىن قابىلدامايدى. ونى قولدايتىندار مۇندا كەلمەدٸ. ال ول جاقتا رەسەيدە بەلسەندٸ وپپوزيتسييانى سويىلمەن ۇرىپ جاتىر. ولار ميتينگٸلەردە, تٷرمەدە وتىر", - دەدٸ احمەد.
احمەت شەشەنستانداعى ەكٸ سوعىستان امان قالدى. ول جارالانعان, سنارياد جارىلىسىنان ٷيسٸز قالعان. ول ساراتوۆتا ٶمٸرٸن جاڭادان باستادى.
"رەسەي ۋكراينامەن دە, ۋكراينالىقتارمەن دە شەشەنستانمەن بٸردەي ەرەكەت ەتٸپ جاتىر. مەن سوعىستىڭ نە ەكەنٸن بٸلەمٸن. ولار موبيليزاتسييا تۋرالى حابارلاعان بويدا ۇلدارىمدى ەكەتۋگە اسىقتىم, سول كەزدە ولار تٷرلٸ قالادا ەدٸ. مەسكەۋدەن ٷلكەن ۇلدارىمدى, كٸشٸسٸن ساراتوۆتان الىپ كەتتٸم. سوندا ٷش بالام مەن ەيەلٸم قالدى. مەن ۇلدارىمنىڭ سوعىسقا كەتۋٸنە, ۋكراينالىقتاردى ٶلتٸرۋٸنە نەمەسە ٶلۋٸنە ەشقاشان جول بەرمەيمٸن", - دەدٸ ەر ادام.
