قازاقستاندىقتار رەسەيگە ٷشٸنشٸ ەلدەردەن ۇشىپ بارا الادى, دەپ حابارلايدى "ۇلت اقپارات" قر سٸم telegram كانالىنا سٸلتەمە جاساپ.
مۇنداي تەرتٸپ رەسەي فەدەراتسيياسى ٷكٸمەتٸنٸڭ 2021 جىلعى 14 سەۋٸردەگٸ N 963-ٶكٸمٸمەن قاراستىرىلعان.
ەندٸ قازاقستان ازاماتتارى رەسەيگە تۇراقتى ەۋە قاتىناسىن قالپىنا كەلتٸرگەن بارلىق ەلدەردٸڭ رەيستەرٸمەن ەشقانداي كەدەرگٸسٸز ۇشىپ كەلە الادى.
قازٸرگٸ ۋاقىتتا رەسەي كەلەسٸ ەلدەرمەن تۇراقتى جولاۋشىلار رەيستەرٸن جٷزەگە اسىرادى: قازاقستان, ۇلىبريتانييا (2021 جىلدىڭ 1 ماۋسىمىنا دەيٸن توقتاتىلدى), تانزانييا (بەلگٸسٸز مەرزٸمگە توقتاتىلدى), تٷركييا, شۆەيتسارييا, مىسىر, مالديۆ ارالدارى, بٸرٸككەن اراب ەمٸرلٸكتەرٸ, قىرعىزستان, كورەيا رەسپۋبليكاسى, كۋبا, سەربييا, جاپونييا, سەيشەل ارالدارى, ەفيوپييا, ۆەتنام, ٷندٸستان, كاتار, فينلياندييا, ەزەربايجان, ارمەنييا, گرەكييا, سينگاپۋر, ۆەنەسۋەلا, گەرمانييا, سيرييا, تەجٸكستان, ٶزبەكستان, شري-لانكا.
ايتا كەتەيٸك, بۇعان دەيٸن قر ازاماتتارى قازاقستاننان رەسەيگە تٸكەلەي ەۋە رەيستەرٸمەن عانا كەدەرگٸسٸز ۇشىپ كەلە الاتىن, ٷشٸنشٸ ەلدەر ارقىلى ۇشىپ كەلۋ وسى ەلدەردە تۇرۋعا ىقتييارحاتى بولعان جاعدايدا عانا مٷمكٸن بولعان.
سونداي-اق, رەسەيگە كٸرۋ كەزٸندە شەتەلدٸك ازاماتتارعا شەكارادان ٶتكەنگە دەيٸن كەمٸندە 72 ساعات بۇرىن بەرٸلگەن پتر ەدٸسٸمەن COVID-19 تەستٸنٸڭ تەرٸس نەتيجەسٸ بار انىقتاما قاجەت بولادى.
