قازاقستاندىقتار بٷگٸننەن باستاپ جٷرگٸزۋشٸ كۋەلٸگٸنسٸز كٶلٸك جٷرگٸزە الادى, دەپ حابارلايدى "ۇلت اقپارات".
ەسكە سالا كەتەيٸك, 21 قاڭتاردا پارلامەنت سەناتىنىڭ جالپى وتىرىسىندا «قازاقستان رەسپۋبليكاسىنىڭ كەيبٸر زاڭنامالىق اكتٸلەرٸنە جول جٷرٸسٸ مەسەلەلەرٸ بويىنشا ٶزگەرٸستەر مەن تولىقتىرۋ ەنگٸزۋ تۋرالى» زاڭى ەكٸ وقىلىمدا قارالىپ, قابىلدانعان بولاتىن.
زاڭدا قازاقستان رەسپۋبليكاسىندا بەرٸلگەن جٷرگٸزۋشٸ كۋەلٸگٸ مەن كٶلٸك قۇرالىن تٸركەۋ تۋرالى كۋەلٸكتٸ ٶزٸمەن بٸرگە الىپ جٷرۋدٸ تالاپ ەتەتٸن نورمانى قولدانىستاعى زاڭنامادان الىپ تاستاۋ ەسكەرٸلگەن.
ياعني, اۆتوكٶلٸك يەسٸن پوليتسييا توقتاتقان كەزدە, ول جەكە كۋەلٸگٸن ۇسىنىپ, سول جەكە كۋەلٸكپەن پوليتسييا قىزمەتكەرٸ پلانشەت ارقىلى ەلەكتروندىق بازادا ونىڭ قاجەتتٸ قۇجاتتارى بويىنشا تەكسەرۋ جٷرگٸزە الادى.
وسى جىلى 1 اقپاندا مەملەكەت باسشىسى «قازاقستان رەسپۋبليكاسىنىڭ كەيبٸر زاڭنامالىق اكتٸلەرٸنە جول جٷرٸسٸ مەسەلەلەرٸ بويىنشا ٶزگەرٸستەر مەن تولىقتىرۋ ەنگٸزۋ تۋرالى» قازاقستان رەسپۋبليكاسىنىڭ زاڭىنا قول قويدى.
ال وسىدان بٸر اپتا بۇرىن ٸشكٸ ٸستەر مينيسترٸ ەرلان تۇرعىمباەۆ 13 اقپاننان باستاپ ەلٸمٸزدٸڭ ازاماتتارىنا كٶلٸكتٸ تيٸستٸ قۇجاتتاردى الىپ جٷرمەي-اق, تەك جەكە كۋەلٸكپەن جٷرگٸزۋگە بولاتىنىن جارييا ەتكەن ەدٸ.
