بجزق ينۆەستيتسييالىق پورتفەلدٸ باسقارۋشىلارعا زەينەتاقى جيناقتارىنىڭ العاشقى اۋدارىمدارىن جاسادى, دەپ حابارلايدى "ۇلت اقپارات" قوردىڭ باسٷپاسٶز قىزمەتٸنە سٸلتەمە جاساپ.
2021 جىلعى 15 ناۋرىزداعى جاعداي بويىنشا بجزق 2021 جىلدىڭ 18 اقپانىنان بەرٸ تٷسكەن 190 ٶتٸنٸشتٸ ٶڭدەپ, ينۆەستيتسييالىق پورتفەلدٸ باسقارۋشىلارعا (يپب) شامامەن 521,4 ملن تەڭگە اۋداردى. اۋدارىمنىڭ ورتاشا سوماسى شامامەن 2,7 ملن تەڭگە.
ورىندالعان ٶتٸنٸشتەردٸڭ 54% استامى الماتى قالاسىنىڭ تۇرعىندارىنان تٷستٸ. الماتىلىقتاردىڭ يپب-عا سەنٸپ تاپسىرعان اۋدارىمدارىنىڭ ورتاشا سوماسى 2,7 ملن تەڭگەنٸ قۇرادى. ورىندالعان ٶتٸنٸشتەردٸڭ 18% استامىن نۇر-سۇلتان قالاسىنىڭ تۇرعىندارى بەردٸ. يپب-عا اۋدارىلعان ورتاشا سوما 4,3 ملن تەڭگە. باسقارۋشى كومپانييالارعا اۋدارىلعان ەڭ كٶپ سومالاردىڭ (ورتا ەسەپپەن 6,7 ملن تەڭگە) يەگەرلەرٸ – اتىراۋ وبلىسىنىڭ تۇرعىندارى. مۇندا زەينەتاقى جيناقتارىن اۋدارۋ تۋرالى بار-جوعى ٷش ٶتٸنٸش ورىندالدى, بٸراق ولاردىڭ جالپى سوماسى 20 ملن تەڭگە.
15 ناۋرىزداعى جاعداي بويىنشا بجزق-عا جيناقتاردى يپب-عا اۋدارۋ تۋرالى بارلىعى 732 ٶتٸنٸش تٷسكەن. ونىڭ 190-ى ورىندالىپ, 403 ٶتٸنٸش قازٸرگٸ سەتتە ٶڭدەلۋ ٷستٸندە, ال 139 ٶتٸنٸشتٸ ورىنداۋدان باس تارتىلدى.
زەينەتاقى جيناقتارىن اۋدارۋ ٷشٸن سالىمشى بجزق-عا ٶتٸنٸش جاساۋى قاجەت, ونى enpf.kz سايتىنداعى جەكە كابينەت ارقىلى نەمەسە بجزق-نىڭ كەز كەلگەن ٶڭٸرلٸك بٶلٸمشەسٸنە ٶزٸ كەلگەندە بەرۋگە بولادى.
ەسكە سالساق, 2 قاڭتاردا قر پرەزيدەنتٸ قاسىم-جومارت توقاەۆ زەينەتاقى جيناعىنىڭ بٸر بٶلٸگٸن ماقساتتى پايدالانۋعا قاتىستى زاڭعا قول قويدى.
قازاقستاندىقتاردىڭ زەينەتاقى جيناقتارىن پايدالانۋ ٷشٸن جاڭارتىلعان «جەتكٸلٸكتٸلٸك شەگٸ» جارييالاندى. زەينەتاقى جيناعىنان الۋعا بولاتىن سوما بجزق سايتىندا اۆتوماتتى تٷردە كٶرسەتٸلەدٸ.
سونىمەن قاتار, باسقارۋشى كومپانييالارعا بەرٸلەتٸن قاراجاتتان تابىس سالىعى الىنبايدى. قازاقستاندىقتار 6 كومپانيياعا زەينەتاقى جيناعىن ينۆەستيتسييالاي الادى.
