3 قاراشادا مەجٸلٸس "قازاقستان تەۋەلسٸزدٸگٸنٸڭ 30 جىلدىعىنا وراي راقىمشىلىق جاساۋ جٶنٸندە" زاڭ جوباسىن ماقۇلدادى. قۇجات ەلدە اسا اۋىر ەمەس جەنە ورتاشا دەرەجەدەگٸ قىلمىس بويىنشا سوتتالعانداردى بوساتۋدى, اۋىر جەنە اسا اۋىر قىلمىس جاساعانداردىڭ جازاسىن قىسقارتۋدى قاراستىرادى, دەپ حابارلايدى ازاتتىق.
قۇجاتتى تانىستىرعان ٸشكٸ ٸستەر مينيسترٸ ەرلان تۇرعىمباەۆتىڭ سٶزٸنە قاراعاندا, راقىمشىلىققا 2236 تۇتقىن مەن پروباتسييا قىزمەتٸندەگٸ 11 310 ادام ٸلٸنەدٸ.
"راقىمشىلىق ارداگەرلەرگە, كەمەلەتكە تولماعاندارعا, جاسى ٷلكەندەرگە, بٸرٸنشٸ جەنە ەكٸنشٸ توپتاعى مٷگەدەكتەرگە, قوعامعا قاۋٸپ تٶندٸرمەيتٸن ادامدارعا قولدانىلادى», - دەدٸ مينيستر.
ونىڭ ايتۋىنشا, ەلدە 64 تٷزەتۋ مەكەمەسٸ, 16 تەرگەۋ يزولياتورى بار. وندا 34 مىڭ ادام بار. 30 مىڭ ادامعا سوت ٷكٸمٸ شىققان, قالعانى تەرگەلٸپ جاتىر. 93 پايىزى اۋىر جەنە اسا اۋىر قىلمىس جاساعانى ٷشٸن قاماۋدا وتىر. 45 پايىزى ونىڭ الدىندا بٸرنەشە رەت سوتتالعان. 32 مىڭ ادام پروباتسييالىق باقىلاۋدا.
"بٸرٸنشٸدەن, شامامەن 1 مىڭ ادام بوستاندىققا شىعادى, 3,8 مىڭ ادام پروباتسييا قىزمەتٸ تٸركەۋٸنەن الىنادى. ەكٸنشٸدەن, 1294 سوتتالۋشى مەن پروباتسييادا تۇرعان 7392 ادامنىڭ جازاسى قىسقارتىلادى. ٷشٸنشٸدەن, سوت ٶندٸرٸسٸنە دەيٸن اشىلعان 5 مىڭ قىلمىستىق ٸس قىسقارتىلادى, 1674 ادام قىلمىستىق جاۋاپكەرشٸلٸكتەن بوساتىلادى, 1471 ادامعا جازانى قىسقارتۋ نەمەسە بوساتۋ جاعدايى قولدانىلادى" دەدٸ ەرلان تۇرعىمباەۆ.
