3 qarashada májilis "Qazaqstan táýelsizdiginiń 30 jyldyǵyna orai raqymshylyq jasaý jóninde" zań jobasyn maquldady. Qujat elde asa aýyr emes jáne ortasha dárejedegi qylmys boiynsha sottalǵandardy bosatýdy, aýyr jáne asa aýyr qylmys jasaǵandardyń jazasyn qysqartýdy qarastyrady, dep habarlaidy Azattyq.
Qujatty tanystyrǵan ishki ister ministri Erlan Turǵymbaevtyń sózine qaraǵanda, raqymshylyqqa 2236 tutqyn men probatsiia qyzmetindegi 11 310 adam ilinedi.
"Raqymshylyq ardagerlerge, kámeletke tolmaǵandarǵa, jasy úlkenderge, birinshi jáne ekinshi toptaǵy múgedekterge, qoǵamǵa qaýip tóndirmeitin adamdarǵa qoldanylady», - dedi ministr.
Onyń aitýynsha, elde 64 túzetý mekemesi, 16 tergeý izoliatory bar. Onda 34 myń adam bar. 30 myń adamǵa sot úkimi shyqqan, qalǵany tergelip jatyr. 93 paiyzy aýyr jáne asa aýyr qylmys jasaǵany úshin qamaýda otyr. 45 paiyzy onyń aldynda birneshe ret sottalǵan. 32 myń adam probatsiialyq baqylaýda.
"Birinshiden, shamamen 1 myń adam bostandyqqa shyǵady, 3,8 myń adam probatsiia qyzmeti tirkeýinen alynady. Ekinshiden, 1294 sottalýshy men probatsiiada turǵan 7392 adamnyń jazasy qysqartylady. Úshinshiden, sot óndirisine deiin ashylǵan 5 myń qylmystyq is qysqartylady, 1674 adam qylmystyq jaýapkershilikten bosatylady, 1471 adamǵa jazany qysqartý nemese bosatý jaǵdaiy qoldanylady" dedi Erlan Turǵymbaev.
