قر دەنساۋلىق ساقتاۋ ۆيتسە-مينيسترٸ, باس مەملەكەتتٸك سانيتارلىق دەرٸگەر ەرلان قيياسوۆ كوروناۆيرۋستىڭ ٶرشۋٸنٸڭ الدىن الۋ ٷشٸن تيٸستٸ جۇمىستار اتقارىلعانىن ايتتى, دەپ حابارلايدى "ۇلت اقپارات".
«بۇدان بۇرىن پەسيميستٸك ەسەپتەۋلەر بويىنشا ٸندەتتٸڭ ٶرشۋ مٷمكٸندٸگٸ ناۋرىزدىڭ سوڭى مەن سەۋٸردٸڭ باسىنا قاراستىرىلعان ەدٸ. الايدا قازٸرگٸ جاعدايدا ەسكەرە وتىرىپ, وسىعان دەيٸن بەلگٸلەنگەن قاۋٸپ سەيٸلگەنٸن بايقاۋعا بولادى. قازٸرگٸ كەزدە جاعداي وپتيميستٸك ستسەناريي بويىنشا قالىپتاسىپ كەلەدٸ», - دەدٸ ە. قيياسوۆ ورتالىق كوممۋنيكاتسييالار قىزمەتٸندە.
سونىمەن قاتار ول بىلتىرعى جاز ايلارىنداعىداي ٸندەتتٸڭ ٶرشۋٸ بولماۋى ٷشٸن تيٸستٸ جۇمىستار اتقارىلعانىن جەتكٸزدٸ.
«كوروناۆيرۋس ينفەكتسيياسىنىڭ تارالۋىن شەكتەۋگە باعىتتالعان قادامدار تيٸستٸ وڭ نەتيجەسٸن بەردٸ دەپ ٷمٸتتەنەمٸز. سوندىقتان ٶتكەن جىلداعى احۋال قايتالانبايدى دەپ سانايمىز», - دەدٸ ۆيتسە-مينيستر.
كوروناۆيرۋس ينفەكتسيياسىنا قارسى ۆاكتسينالاۋ جالعاسىپ جاتىر. قازٸرگٸ كەزدە بٸرٸنشٸ كومپونەنتپەن 20 157 ادام ەگٸلدٸ. 22 اقپاننان باستاپ ەكٸنشٸ كومپونەنتپەن ۆاكتسينالاۋ باستالىپ, 2 137 ادامعا ەكپە جاسالدى, قولايسىز كٶرٸنٸستەر تٸركەلگەن جوق.
