مۇناي جەتكٸزۋشٸ الپاۋىت كەسٸپورىندار ديزەل باعاسىن كٶتەرٸپ جٸبەردٸ. قر پرەمەر-مينيسترٸنٸڭ بٸرٸنشٸ ورىنباسارى رومان سكليار مەجٸلٸس دەپۋتاتتارىنىڭ ساۋالىنا وسىلاي جاۋاپ بەردٸ, دەپ حابارلايدى قازاقپارات.
«اقپارات-اناليتيكا اگەنتتٸكتەرٸنٸڭ دەرەگٸ بويىنشا, مۇناي جەتكٸزۋشٸ ٸرٸ كەسٸپورىندار («PETROSUN» جشس مەن «قازمۇنايگاز» ۇك» اق) ديزەلدٸڭ بٸر تونناسىن 10-15 تەڭگەگە نەمەسە ليترٸن 8-12 تەڭگەگە دەيٸن كٶتەرٸپ جٸبەرگەن. دەل وسىنداي ٶسٸم باسقا جەتكٸزۋشٸلەردەن دە بايقالىپ وتىر. بٶلشەك ساۋداداعى باعا رەتتەلٸپ وتىرعان كەزەڭدە اكتسيز مٶلشەرلەمەسٸن كٶتەرۋ مۇناي جەتكٸزۋشٸلەر مەن جەر قويناۋىن پايدالانۋشىلاردىڭ, مۇناي ٶنٸمدەرٸن ساتاتىن دەلدالداردىڭ تابىسىن تٶمەندەتتٸ. سوعان قاراماستان شەكتٸ باعا ٶزگەرٸسسٸز قالىپ وتىر. سوندىقتان ٶكٶتەمگٸ ەگٸس ناۋقانى كەزٸندە ديزەل باعاسى ٶسكەن جوق» دەپ جازادى رومان سكليار جاۋابىندا.
ونىڭ سٶزٸنشە, قازاقستان اۋماعىندا مىنانداي اكتسيز مٶلشەرلەمەلەرٸ بەلگٸلەنگەن:
- بەنزيننٸڭ كٶتەرمە ساۋداسىنا (اۆياتسييا بەنزينٸن قوسپاعاندا) (كود تن ۆەد ەاەس 2710 12 4110 – 271012 590 0) – 1 تونناعا 38 134 تەڭگە;
- ديزەلدٸڭ كٶتەرمە ساۋداسىنا (كود تن ۆەد ەاەس 2710 19 421 0- 2710 19 425 0) – 1 تونناعا 35 726 تەڭگە.
«بۇعان قوسا جانارماي باعاسىنىڭ كٷرت ٶسۋٸن بولدىرماۋ ٷشٸن مۇناي باعاسىن تاۋار بيرجالارىندا كٶتەرمە باعامەن ٶتكٸزۋدٸڭ ۇسىنىمدارىنا ٶزگەرتۋلەر ەنگٸزٸلدٸ. بۇل ۇسىنىمدار بيرجالداعى ساۋدا ەرەجەسٸ بەكٸتٸلگەنگە دەيٸن قولدانىلادى. ول بويىنشا, بٸر ساۋدا سەسسيياسىنىڭ كەزەڭٸندە باعا 1%-دان ارتىق قىمباتتاماۋى كەرەك. بيرجاداعى ساۋداعا قاتىسۋدىڭ جىلدىق اينالىمىنا بەلگٸلەنگەن 5 مىڭ توننالىق شەك الىپ تاستالدى. بۇل جانارماي قۇيۋ ستانسالارىنا جانارمايدى شاعىن مٶلشەرمەن, بيرجا ارقىلى رەسۋرس ۇستاۋشىلاردان تٸكەلەي ساتىپ الۋعا مٷمكٸندٸك بەرەدٸ», - دەپ اتاپ ٶتتٸ ٷكٸمەت باسشىسىنىڭ ورىنباسارى.
13 مامىردان باستاپ ديزەلدٸ بيرجادا FCA شارتىمەن ساتاۋ قايتا جاندانعان بولاتىن.
«مۇناي ٶڭدەۋشٸ زاۋىتتار ۇسىنعان باستاپقى باعا تونناسىنا 222 – 227 مىڭ تەڭگە نەمەسە ليترٸنە 184 – 188 تەڭگە بولدى. ال بٶلشەك ساۋدادا 1 ليتر ديزەلدٸڭ باعاسى 230 – 260 تەڭگە بولىپ وتىر», - دەيدٸ رومان سكليار.
