بانگكوكتە (تايلاند) اياقتالعان بوكستان ازييا چەمپيوناتىندا قازاقستاندىق بىلعارى قولعاپ شەبەرلەرٸ تۇرسىنباي قۇلاحمەت (75 كگ) پەن بەك نۇرماعانبەت (81 كگ) التىن مەدال الدى. 26 سەۋٸردە ٶتكەن فينالدا قۇلاحمەت ٷندٸستاندىق اشيم كۋماردى, نۇرماعانبەت فيليپپيندٸك دجون نوبەل مارۆيندٸ جەڭدٸ.
60 كەلٸدە بوكستاسقان قازاقستاندىق زاكير سافيۋللين فينالدا موڭعولييالىق تسەندبااتار ەردەنەباتتان جەڭٸلٸپ, كٷمٸس الدى. +91 كەلٸدە قامشىبەك قونقاباەۆ ٶزبەكستاندىق باحودير جالولوۆتان ۇتىلىپ, ەكٸنشٸ ورىن يەلەندٸ.
قازاقستاندىق ٷش بوكسشى تەمٸرتاس جٷسٸپوۆ (48 كگ), ساناتەلي تولتاەۆ (64 كگ), ريو وليمپياداسىندا كٷمٸس مەدال العان ۆاسيليي لەۆيت (91 كگ) ازييا چەمپيوناتىنىڭ قولا جٷلدەگەرٸ اتاندى. قازاقستان بانگكوك قالاسىنداعى جارىستا 2 التىن, 2 كٷمٸس, 3 قولا يەلەندٸ.
قازاقستان بوكس قۇراماسى 2017 جىلعى ازييا بٸرٸنشٸلٸگٸندە 1 التىن (ۆاسيليي لەۆيت چەمپيون بولعان), 3 كٷمٸس, 4 قولا مەدال العان ەدٸ. بوكستان كەلەسٸ ازييا چەمپيوناتى 2021 جىلى ٶتەدٸ. جارىستى قاي قالا ۇيىمداستىراتىنى بەلگٸسٸز.
