قر ستراتەگييالىق جوسپارلاۋ جەنە رەفورمالار اگەنتتٸگٸنٸڭ تٶراعاسى قايرات كەلٸمبەتوۆ موبيلدٸ اۋدارىمدار بويىنشا تۋىنداعان مەسەلەگە پٸكٸر بٸلدٸردٸ, دەپ حابارلايدى قازاقپارات.
«قازٸر قازاقستاندا موبيلدٸ اۋدارىمدار جٶنٸندە قىزىق جاعداي بولىپ جاتىر. سٸز ۇلتتىق بانكتٸڭ بۇرىنعى تٶراعاسى رەتٸندە جاڭا تەحنولوگييالىق ينفراقۇرىلىمنىڭ قالىپتاسقانىن كٶردٸڭٸز. ەندٸ ەلەكتروندىق ەمييانداردى باقىلاۋدى كٷشەيتۋگە قالاي قارايسىز?»,- دەپ سۇرادى «حابار» تەلەارناسىنداعى «ۇلتتىق مٷددە» باعدارلاماسىنىڭ جٷرگٸزۋشٸسٸ ەرلان بەكحوجين سپيكەردەن.
«مۇندا ەكٸ سەتتٸ اتاپ ٶتۋ قاجەت. بٸر جاعىنان, بٸز موبيلدٸ اۋدارىمداردى ىنتالاندىرۋىمىز كەرەك. ٶزدەرٸڭٸز بٸلەسٸزدەر, جاڭا ەكوجٷيە پايدا بولدى, سونىڭ ارقاسىندا كٷندەلٸكتٸ ٶمٸردە كوممۋنالدىق شىعىنداردى تٶلەپ, كينوتەاترلار مەن دٷكەندەردە تٶلەم جاسايتىن قازاقستان ازاماتتارى عانا ەمەس, كەسٸپكەرلەر دە مۇنى بيزنەسٸن جٷرگٸزۋگە قولدانا باستادى. مەنٸڭ ويىمشا, مۇندا قولما-قول تٶلەمگە نەگٸزدەلگەن ەكونوميكادان ونلاين تٶلەمگە كٶشكەن تٶڭكەرٸس بولىپ جاتقانىن ايتۋ كەرەك. ەكٸنشٸ دەڭگەيلٸ بانكتەر تسيفرلاندىرۋ جارىسىن باستادى. بۇل پروتسەستٸ توقتاتۋعا بولمايدى, بۇل - ەل ٷشٸن ٶتە ماڭىزدى ەرٸ قاجەتتٸ پروتسەسس», - دەدٸ قايرات كەلٸمبەتوۆ باعدارلاما ەفيرٸندە.
اگەنتتٸك تٶراعاسىنىڭ ايتۋىنشا, سالىق سالۋ مەسەلەسٸ تۋىنداعان جاعدايدا قارجى رەتتەۋشٸمەن, ۇلتتىق بانكپەن جەنە تٸكەلەي وسى نارىقتىڭ قاتىسۋشىلارىمەن ەكوجٷيەنٸ دامىتۋعا زييان كەلتٸرمەي كەلٸسۋ قاجەت.
«مەنٸڭ جەكە كٶزقاراسىم – قازٸرگٸ كەزەڭدە ەكوجٷيەنٸڭ دامۋىن ىنتالاندىرۋ قاجەت شىعار. سودان كەيٸن جالپىمەملەكەتتٸك تسيفرلىق ەكوجٷيەنٸڭ بٸر بٶلٸگٸنە اينالاتىن, قانداي دا بٸر سالىق سالۋ مەسەلەسٸ كٶتەرٸلەتٸن جەنە بۇل ازاماتتارىمىز بەن كەسٸپكەرلەرٸمٸزدٸ مازالامايتىن كەزەڭ سٶزسٸز, تابيعي جولمەن ٶزٸ كەلەدٸ», - دەدٸ كەلٸمبەتوۆ.
