QR Strategiialyq josparlaý jáne reformalar agenttiginiń tóraǵasy Qairat Kelimbetov mobildi aýdarymdar boiynsha týyndaǵan máselege pikir bildirdi, dep habarlaidy QazAqparat.
«Qazir Qazaqstanda mobildi aýdarymdar jóninde qyzyq jaǵdai bolyp jatyr. Siz Ulttyq banktiń burynǵy tóraǵasy retinde jańa tehnologiialyq infraqurylymnyń qalyptasqanyn kórdińiz. Endi elektrondyq ámiiandardy baqylaýdy kúsheitýge qalai qaraisyz?»,- dep surady «Habar» telearnasyndaǵy «Ulttyq múdde» baǵdarlamasynyń júrgizýshisi Erlan Bekhojin spikerden.
«Munda eki sátti atap ótý qajet. Bir jaǵynan, biz mobildi aýdarymdardy yntalandyrýymyz kerek. Ózderińiz bilesizder, jańa ekojúie paida boldy, sonyń arqasynda kúndelikti ómirde kommýnaldyq shyǵyndardy tólep, kinoteatrlar men dúkenderde tólem jasaityn Qazaqstan azamattary ǵana emes, kásipkerler de muny biznesin júrgizýge qoldana bastady. Meniń oiymsha, munda qolma-qol tólemge negizdelgen ekonomikadan onlain tólemge kóshken tóńkeris bolyp jatqanyn aitý kerek. Ekinshi deńgeili bankter tsifrlandyrý jarysyn bastady. Bul protsesti toqtatýǵa bolmaidy, bul - el úshin óte mańyzdy ári qajetti protsess», - dedi Qairat Kelimbetov baǵdarlama efirinde.
Agenttik tóraǵasynyń aitýynsha, salyq salý máselesi týyndaǵan jaǵdaida qarjy retteýshimen, Ulttyq bankpen jáne tikelei osy naryqtyń qatysýshylarymen ekojúieni damytýǵa ziian keltirmei kelisý qajet.
«Meniń jeke kózqarasym – qazirgi kezeńde ekojúieniń damýyn yntalandyrý qajet shyǵar. Sodan keiin jalpymemlekettik tsifrlyq ekojúieniń bir bóligine ainalatyn, qandai da bir salyq salý máselesi kóteriletin jáne bul azamattarymyz ben kásipkerlerimizdi mazalamaityn kezeń sózsiz, tabiǵi jolmen ózi keledi», - dedi Kelimbetov.
