جۇمىس بەرۋشٸنٸڭ جۇمىسكەرلەر قاشىقتان جۇمىس ٸستەۋ كەزٸندە پايدالاناتىن قۇپييا اقپاراتتى قورعاۋ تۋرالى شارت جاساسۋ قۇقىعى بەكٸتٸلدٸ.
بۇل تۋرالى مەجٸلٸستٸڭ جالپى وتىرىسىندا تيٸستٸ زاڭ جوباسىن تالقىلاۋ كەزٸندە دەپۋتات جانات وماربەكوۆا ايتتى, دەپ حابارلايدى "ۇلت اقپارات".
بٷگٸن جالپى وتىرىستا «قازاقستان رەسپۋبليكاسىنىڭ ەڭبەك كودەكسٸنە قاشىقتان جۇمىس ٸستەۋدٸ قۇقىقتىق رەتتەۋدٸ جەتٸلدٸرۋ مەسەلەلەرٸ بويىنشا ٶزگەرٸستەر مەن تولىقتىرۋلار ەنگٸزۋ تۋرالى» زاڭ جوباسى بٸرٸنشٸ وقىلىمدا ماقۇلداندى.
«جۇمىس بەرۋشٸنٸڭ اكتٸسٸ بويىنشا قىزمەتتٸك مٸندەتتەردٸ ەڭبەك شارتىن جاساسپاي جٷزەگە اسىراتىن مەملەكەتتٸك قىزمەتشٸلەردٸ, ەسكەري قىزمەتشٸلەردٸ, ارناۋلى مەملەكەتتٸك جەنە قۇقىق قورعاۋ ورگاندارىنىڭ قىزمەتكەرلەرٸن قاشىقتان جۇمىس ٸستەۋگە جٸبەرۋ تەرتٸبٸ رەگلامەنتتەلدٸ. جۇمىس بەرۋشٸنٸڭ جۇمىسكەرلەر قاشىقتان جۇمىس ٸستەۋ كەزٸندە پايدالاناتىن قۇپييا اقپاراتتى قورعاۋ تۋرالى شارت جاساسۋ قۇقىعى بەكٸتٸلدٸ», - دەدٸ دەپۋتات.
ونىڭ ايتۋىنشا, جۇمىسكەرلەردٸڭ ەڭبەك قۇقىقتارىن قورعاۋ ماقساتىندا ەڭبەك شارتىندا جۇمىس ۋاقىتىنىڭ تٸركەلگەن ەسەبٸن بەلگٸلەۋ جٶنٸندەگٸ نورما كٶزدەلدٸ. وسى ۋاقىت ٸشٸندە جۇمىسكەر جۇمىس ۋاقىتىنىڭ كٷندەلٸكتٸ ۇزاقتىعىنىڭ شەكتەۋلەرٸن ساقتاي وتىرىپ, جۇمىس ۋاقىتى شەگٸندە جۇمىس بەرۋشٸمەن بايلانىستا بولۋ ٷشٸن قولجەتٸمدٸلٸك رەجيمٸندە بولۋعا تيٸس.
«بۇل رەتتە, ەڭبەك شارتى تاراپتارىنىڭ كەلٸسۋٸ بويىنشا قاشىقتان جۇمىس ٸستەيتٸن جۇمىسكەرلەر ٷشٸن جۇمىس ۋاقىتىنىڭ جيىنتىق ەسەبٸن قولدانا وتىرىپ, يكەمدٸ جۇمىس ۋاقىتى رەجيمٸ بەلگٸلەنۋٸ مٷمكٸن. زاڭ جوباسىنىڭ قابىلدانۋىمەن قاشىقتان جۇمىس ٸستەۋدٸ ناقتى رەگلامەنتتەۋ جەنە ەڭبەك شارتى تاراپتارىنىڭ قۇقىقتارى مەن مٸندەتتەرٸن بەكٸتۋ ارقىلى جۇمىسكەرلەردٸڭ ەڭبەك قۇقىقتارىن قورعاۋ قامتاماسىز ەتٸلەتٸن بولادى», - دەدٸ جانات وماربەكوۆا.
