بٷگٸن پارلامەنت مەجٸلٸسٸنٸڭ پلەنارلىق وتىرىسىنىڭ ەكٸنشٸ وقىلىمىندا دەپۋتاتتار «قازاقستان رەسپۋبليكاسى قىلمىستىق كودەكسٸنە ٶلٸم جازاسى مەسەلەلەرٸ بويىنشا ٶزگەرٸستەر مەن تولىقتىرۋلار ەنگٸزۋ تۋرالى» زاڭ جوباسىن ماقۇلدادى.
بۇل تۋرالى قازاقپارات قازاقستان رەسپۋبليكاسى پرەزيدەنتٸنٸڭ كٶمەكشٸسٸ ەرلان قاريننٸڭ Telegram ەلەۋمەتتٸك جەلٸسٸندەگٸ جازباسىنا سٸلتەمە جاساپ حابارلايدى.
«اتاپ ٶتەيٸك, بۇعان دەيٸن 16 قاراشا كٷنٸ ۇلتتىق قوعامدىق سەنٸم كەڭەسٸنٸڭ التىنشى وتىرىسىندا مەملەكەت باسشىسى قازاقستانداعى ٶلٸم جازاسى ەشقانداي ەسكەرتۋسٸز جويىلۋى قاجەت ەكەنٸن اتاپ ٶتٸپ, سول ارقىلى قۇقىق قورعاۋشىلاردىڭ ۇستانىمىنا قولداۋ بٸلدٸرگەن.
مەجٸلٸس وسىنى ەسەپكە الا وتىرىپ, قىلمىستىق زاڭنامادان ٶلٸم جازاسىن الىپ تاستاۋدى قاراستىراتىن تٷزەتۋلەر دايىندادى»,-دەپ جازدى ەرلان قارين.
بۇدان باسقا, دەپۋتاتتار مەجٸلٸس وتىرىسىنىڭ بٸرٸنشٸ وقىلىمىندا «قازاقستان رەسپۋبليكاسىنداعى بيولوگييالىق قاۋٸپسٸزدٸك تۋرالى» زاڭ جوباسىن قاراستىرىپ, ماقۇلدادى. اتالعان زاڭ جوباسىن دەنساۋلىق ساقتاۋ مينيسترلٸگٸ مٷددەلٸ مەملەكەتتٸك ورگاندارمەن بٸرلەسٸپ مەملەكەت باسشىسىنىڭ ۇلتتىق قوعامدىق سەنٸم كەڭەسٸنٸڭ ٷشٸنشٸ وتىرىسىندا بەرگەن تاپسىرمالارىن ورىنداۋ ماقساتىندا دايارلادى.
