قاراقالپاق تٸلٸندە شىعاتىن "ەل حيزماتيندا" گازەتٸنٸڭ باس رەداكتورى سۇلتونبەك زييوەۆ پەن باسىلىم زاڭگەرٸ داۆرون توجيمۋرودوۆ ٶزبەكستان مەن قاراقالپاقستاننىڭ حالىق ەرتٸسٸ جۇلدىز وسمانوۆانى سوتقا بەردٸ.
سوتقا ارىزدانۋشىلار "قاراقالپاقتار - ٶزبەك شاپانىنىڭ كٶلەڭكەسٸندە ٶمٸر سٷرٸپ جٷرگەن حالىق" دەگەن ٶزبەك ەنشٸسٸنەن كەشٸرٸم سۇراۋدى تالاپ ەتٸپ وتىر. وسمانوۆا مۇنى 2020 جىلى ZO'R TV تەلەارناسىنىڭ "سيز بيلان" باعدارلاماسىندا ايتقان.
گازەت زاڭگەرٸ داۆرون توجيمۋرودوۆتىڭ ايتۋىنشا, ارىزدى تاشكەنت قالاسىنىڭ ميرزو-ۇلىقبەك اۋدانارالىق سوتى قابىلداپ العان. ارىزدا جۇلدىز وسمانوۆا "قاراقالپاق حالقىنان كەشٸرٸم سۇراۋى تيٸس" دەگەن تالاپ بار.
سوت حاتشىسى گازەت ارىزى تٸركەلگەنٸن, بٸراق سوتتىڭ قاشان باستالاتىنى ەزٸرگە بەلگٸسٸز ەكەنٸن ايتتى.
"ەل حيزماتيندا" گازەتٸنٸڭ باس رەداكتورى سۇلتونبەك زييوەۆتٸڭ حابارلاۋىنشا, سوتقا ارىزدانۋ ٷشٸن بەس اي ۋاقىت كەتكەن.
ازاتتىق راديوسىنىڭ ٶزبەك قىزمەتٸنٸڭ تٸلشٸسٸ "سيز بيلان" باعدارلاماسىن قاراپ شىقتى. وندا جۇلدىق وسمانوۆا بىلاي دەگەن:
"بۇل ەل نەگە قاراقالپاقستان دەپ اتالادى دەپ سۇراۋىڭىز مٷمكٸن. وندا ٶمٸر سٷرۋ وڭاي ەمەس. ٶتە اۋىر. بٸراق بۇل حالىق ٶزبەكستان شاپانىنىڭ ٸشٸندە قۇشاقتاسا ٶمٸر سٷرٸپ جاتىر. بٸز قاراقالپاق حالقى ٷشٸن جاۋاپتىمىز. اللانىڭ, باسقا حالىقتاردىڭ الدىندا. ٶيتكەنٸ ولار بٸزدٸڭ بٸر بٶلشەگٸمٸز. ارالدىڭ جارتىسى قۇرعاپ قالدى. ولاردىڭ تۇرمىسى اۋىر, بالىق اۋلاپ ٶمٸر سٷرەدٸ. ولاردا قالا بار (كٸشكەنتاي قالا ەكەنٸن ساۋساعىمەن كٶرسەتەدٸ). بٸراق بٸزدە شالعايداعى مەكەندەردە كيٸزٷيدە تۇراتىن حالىق بار" دەگەن جۇلدىز وسمانوۆا.
ال "ەل حيزماتيندا" گازەتٸنٸڭ باس رەداكتورى مەن زاڭگەرٸ ەنشٸ جۇلدىز وسمانوۆا "قاراقالپاق حالقىنا تٸل تيگٸزدٸ" دەپ وتىر.
قاراقالپاقستان - ٶزبەكستان قۇرامىنداعى پارلامەنتتٸك باسقارۋى بار ەگەمەن رەسپۋبليكا.
