باس پروكۋراتۋرا پروتسەسسۋالدىق ٸس جٷرگٸزۋ كەزٸندە كٷش قولدانۋ فاكتٸلەرٸ بويىنشا جٷرگٸزٸلەتٸن تەكسەرۋلەردٸڭ نەتيجەسٸن اپتا سايىن جارييالاپ تۇرادى. ادام قۇقىقتارى جٶنٸندەگٸ ۋەكٸل ەلۆيرا ەزٸموۆا قۇزىرلى ورگانمەن وسىنداي كەلٸسٸمگە كەلگەنٸن ايتتى, دەپ حابارلايدى قازاقپارات.
«25 قاڭتاردا باس پروكۋراتۋرا ٶكٸلدەرٸ پروكۋراتۋرا ورگاندارىنا قۇقىق قورعاۋ ورگاندارىنىڭ تەرگەۋ بارىسىندا زاڭسىز تەرگەپ-تەكسەرۋ ەدٸستەرٸ مەن ازاماتتاردىڭ قۇقىقتارىن بۇزۋىنا قاتىستى 109 ارىز-شاعىم تٷسكەنٸن حابارلادى. تەكسەرۋ نەتيجەسٸندە 21 قىلمىستىق ٸس قوزعالدى. ونىڭ ٸشٸندە تەك بٸرەۋٸن ارنايى پروكۋرورلار, قالعان 20-سىن سىبايلاس جەمقورلىققا قارسى قىزمەتكەرلەر تەرگەپ جاتىر. ارىزدانۋشىلاردى قايتا جەبٸرلەۋگە جول بەرمەۋ ٷشٸن بارىنشا شارالار قابىلداۋ قاجەت. قىلمىستىق ٸستەردٸڭ بٸرٸ مەنٸڭ اتىما كەلٸپ تٷسكەن ارىزداردىڭ نەگٸزٸندە قىلمىستىق كودەكستٸڭ 145-بابى بويىنشا قوزعالعان», - دەدٸ ول «حابار-24» تەلەارناسىندا ٶتكەن بريفينگٸدە.
سونداي-اق, ەلۆيرا ەزٸموۆا پروتسەسسۋالدىق ٸس جٷرگٸزۋ بارىسىندا كٷش قولدانۋ فاكتٸلەرٸ تۋرالى باسقا شاعىمدار دا تەكسەرٸلەتٸنٸن جەتكٸزدٸ.
«باس پروكۋراتۋرامەن ولاردىڭ نەتيجەلەرٸن اپتا سايىن جارييالاپ تۇرۋ تۋرالى كەلٸسٸمگە كەلدٸك», -دەدٸ ادام قۇقىقتارى جٶنٸندەگٸ ۋەكٸل.
