ورتالىق كوممۋنيكاتسييالار قىزمەتٸندە ٶتكەن بريفينگٸدە قر ەكولوگييا, گەولوگييا جەنە تابيعي رەسۋرستار مينيسترٸ سەرٸكقالي برەكەشەۆكە قاڭعىباس يتتەردٸڭ سانىن رەتتەۋ تۋرالى سۇراق قويىلدى, دەپ حابارلايدى قازاقپارات.
مينيستر بۇل مەسەلە ارنايى زاڭ جوباسىندا ەگجەي-تەگجەي قاراستىرىلعانىن اتادى.
«جانۋارلاردى كٷتٸپ ۇستاۋ جاۋاپكەرشٸلٸگٸ تۋرالى» زاڭ جوباسىنىڭ 24-بابى بويىنشا ولاردى اۋلاۋ, ۋاقىتشا ۇستاۋ, ٶلتٸرۋ شارالارى قازاقستان زاڭناماسىنا سەيكەس جٷزەگە اسىرىلادى. زاڭ جوباسىنىڭ 25-بابىنىڭ 2-تارماعى بويىنشا, قاڭعىباس جانۋارلاردىڭ سانىن ۋلاۋ, حيميكاتتار پايدالانۋ سيياقتى كەز كەلگەن تەسٸلمەن ٶلتٸرۋ ارقىلى رەتتەۋگە تىيىم سالىنادى. بۇل جانۋارلارعا گۋماندى قارىم-قاتىناس تانىتۋ قاعيداتى مەن حالىقتىڭ دەنساۋلىعىن, ٶمٸرٸن قاۋٸپ-قاتەردەن قورعاۋ قاعيداتتارىن تەڭگەرٸمدە قولدانۋ ارقىلى ٸسكە اسۋى كەرەك», - دەدٸ ول.
سونداي-اق, سەرٸكقالي برەكەشەۆ اتالعان قۇجاتتا تٸپتٸ وسى ٸسكە ماماندانعان مەكەمە ٶكٸلدەرٸنە شەكتەۋ قويىلاتىنىن اتادى.
«بۇل ەرەجەدە جانۋار اۋلاۋ قىزمەتتەرٸنە حايۋانداردى باسقا جاعدايلاردا دا ٶلتٸرۋگە تىيىم سالىنادى. زاڭ جوباسىنىڭ ەڭ نەگٸزگٸ يدەياسى قاڭعىباس جانۋارلاردىڭ سانىن گۋماندى جولدارمەن رەتتەۋ ارقىلى ٶلتٸرۋگە تىيىم سالۋعا باعىتتالعان. بۇل: اۋلاپ ۇستاۋ, يەسٸن تابۋ, ۆاكتسينالاۋ, ستەريلدەۋ جەنە ەركٸن تابيعاتقا جٸبەرۋ. سونىمەن بٸرگە, قاڭعىباس جانۋارلاردى اۋلاپ, ٶلتٸرۋگە قاراستىرىلعان قاراجاتتى تولىقتاي جاڭا تەسٸلدٸ ٸسكە اسرۋعا باعىتتاۋ كٶزدەلٸپ وتىر», - دەدٸ مينيستر.
