كانادادا بٸر اپتا بويى كٷن قاتتى ىسىپ, سونىڭ سالدارىنان شامامەن 500 ادام قايتىس بولدى.
بيلٸك شىجىعان كٷننەن زارداپ شەككەندەر بۇدان دا كٶپ بولۋى مٷمكٸن دەپ وتىر.
ۆانكۋۆەر (بريتان كولۋمبيياسى پروۆينتسيياسىنداعى ٸرٸ قالا) قالاسىندا عانا جۇما كٷنٸ 130 ادام ىستىق ٶتٸپ قايتىس بولعان. قازا بولعانداردىڭ دەنٸ قارت كٸسٸلەر, سوزىلمالى اۋرۋى بارلار.
پروۆينتسييادا اۋا تەمپەراتۋراسى تٶرت كٷن بويى كٶتەرٸلگەن, سەيسەنبٸ كٷنٸ ليتتون قالاسىندا 49,5 گرادۋس ىستىق تٸركەلگەن.
پروۆينتسيياداعى تٶتەنشە جاعدايعا بايلانىستى كٶپتەگەن مەكەمە, سونىڭ ٸشٸندە مەكتەپتەر مەن بالا باقشالار ۋاقىتشا جابىلدى. جەرگٸلٸكتٸ بيلٸك ۋاقىتشا بۇرقاقتار ورنالاستىرىپ, كٶشەلەرگە سۋ سەپتٸ. سالقىنداۋعا ارنالعان ورتالىقتار اشىلدى. قالاداعى بۇرقاقتار تەۋلٸك بويى جۇمىس ٸستەپ تۇر.
اقش-تىڭ سولتٷستٸك-باتىس جاعالاۋلارىندا دا كٷن قاتتى ىسىدى.پورتلەند (ورەگون شتاتى) پەن سيەتلدە (ۆاشينگتون شتاتى) اۋا تەمپەراتۋراسى 46 گرادۋستى كٶرسەتتٸ.
ىستىقتان قاشقان تۇرعىنداردىڭ كەيبٸرٸ جەر استى گاراجدارىنا تٷسٸپ, تٸپتٸ اۆتوكٶلٸك سالقىنداتقىشىنىڭ كٶمەگٸمەن جان ساقتاۋعا مەجبٷر. ورەگون شتاتىندا اپتاپ ىستىقتان 60-تان استام ادام قايتىس بولسا, ۆاشينگتوندا وننان استام ادام قايتتى.
