ٶتكەن عاسىرداعى ەيگٸلٸ جازۋشىلاردىڭ بٸرٸ فرانتس كافكانىڭ قولجازباسىنىڭ قالعان بٶلٸگٸ يزرايل ۇلتتىق كٸتاپحاناسىنا بەرٸلدٸ. بۇل تۋرالى Associated Press حابارلادى.
چەحييادا تۋىپ-ٶسكەن تەگٸ ەۆرەي جازۋشى شىعارمالارىن نەمٸس تٸلٸندە جازعان.
كٸتاپحاناعا كافكانىڭ "اۋىلداعى تويعا دايىندىق" ەڭگٸمەسٸنٸڭ ٷش قولجازبا نۇسقاسى, يۆريت تٸلٸندە جازىلعان دەپتەر, دوستارىنا جازعان جٷزدەگەن حات, جول جازبالارى مەن سۋرەتتەر تاپسىرىلدى. ولاردىڭ كەيبٸرٸ بۇعان دەيٸن ەش جەردە جارييالانباعان. كٸتاپحانا ٶكٸلدەرٸنٸڭ مەلٸمدەۋٸنشە, قولجازبانى جىل سوڭىنا دەيٸن تسيفرلىق قۇجاتقا كٶشٸرٸپ, كەيٸن كٶپتٸڭ نازارىنا ۇسىنۋ جوسپارلانىپ وتىر.
كافكا قولجازبالارىن داۋلاپ, سوتقا جٷگٸنگەن اپالى-سٸڭلٸلٸ ەكٸ ادامنىڭ ايتۋىنشا, بۇل دٷنيەلەر ولارعا جازۋشىنىڭ دوسى ەرٸ بيوگرافى ماكس برودتىڭ حاتشىسى بولىپ ٸستەگەن انالارى ەستەر حوففەدەن قالعان. كافكا دوسىنا قولجازبالاردى ٶرتەۋدٸ تاپسىرعان, بٸراق برود ولاردى ساقتاۋدى ۇيعارعان.
حوففە شۆەيتسارييالىق بانكتە ساقتاعان قۇجاتتار ونداعان جىلدار بويى سوندا بولعان. 2008 جىلى اپالى-سٸڭلٸلەر بۇل قۇجاتتاردىڭ زاڭدى يەسٸ ٶزدەرٸ ەكەنٸن مەلٸمدەپ, سوت پروتسەسٸ باستالعان. بيىل كٶكتەمدە شۆەيتسارييا سوتى كافكا قولجازبالارىن يزرايلگە بەرۋ تۋرالى شەشٸم شىعارعان.
