يتالييادا COVID-19 سالدارىنان تىنىس الۋ ورگانىنان ايىرىلعان 18 جاستاعى جٸگٸتتٸڭ ٶكپەسٸ اۋىستىرىلدى, دەپ حابارلايدى ANSA.
بۇل – ەۋروپادا جاسالعان وسىنداي العاشقى وتا. وپەراتسييا ميلانداعى اۋرۋحانادا جاسالدى.
فرانچەسكو ەسٸمدٸ جٸگٸتتە 2 ناۋرىزدا كوروناۆيرۋس ينفەكتسيياسىنىڭ بەلگٸلەرٸ پايدا بولعان, 6 ناۋرىزدا ول ميلانداعى سان-راففاەلە اۋرۋحاناسىنىڭ جانساقتاۋ بٶلٸمٸنە جاتقىزىلدى. 23 ناۋرىزدا جاساندى قان اينالىمى قۇرىلعىسىنا قوسىلدى.
سوعان قاراماستان, كوروناۆيرۋس ينفەكتسيياسىنىڭ اۋىر تٷرٸنە شالدىققاندىقتان ونىڭ ٶكپەسٸ ٸستەمەي قالدى. سەۋٸردٸڭ ورتاسىندا سان-راففاەلە دەرٸگەرلەرٸ ناۋقاستىڭ ٶكپەسٸن اۋىستىرۋ تۋرالى شەشٸم قابىلدادى.
بۇعان دەيٸن وسىنداي وپەراتسييا تەك قىتايدا جاسالىپ كەلگەن. بٸراق, ميلانداعى ٶكپە ترانسپلانتاتسيياسىنان كەيٸن بٸرنەشە كٷن ٶتكەن سوڭ مۇنداي وتا ۆەنادا دا جاسالدى.
مەملەكەتتٸك ۋنيۆەرسيتەتتٸڭ كٶكٸرەك قۋىسى حيرۋرگيياسى مەكتەبٸنٸڭ باسشىسى ماريو نوزوتتيدٸڭ ايتۋىنشا, وپەراتسييا كٷردەلٸ بولعان. ەندٸ جاس جٸگٸت ۇزاق ۋاقىت وڭالتۋدان ٶتەدٸ.
