گولوۆكين-شەرەمەتا كەشٸندە تاعى بٸر قازاقستاندىق جەكپە-جەك ٶتكٸزەدٸ

18 جەلتوقساندا گولليۆۋدتىڭ (فلوريدا, اقش) «Seminole Hard Rock Hotel & Casino» ارەناسىندا قازاقستاندىق كەسٸپقوي بوكسشى, ورتا سالماقتاعى IBF/IBO ەلەم چەمپيونى گەنناديي گولوۆكيننٸڭ (40-1-1, 35 كو) قاتىسۋىمەن كەسٸپقوي بوكس كەشٸ ٶتەدٸ. جەرلەسٸمٸز بۇل كٷنٸ ٶزٸنٸڭ مٸندەتتٸ قارسىلاسى كاميل شەرەمەتامەن (21-0, 5 كو) كەزدەسەدٸ, دەپ حابارلايدى Sports.kz پورتالى.

باستى جەكپە-جەكتەردٸڭ بٸرٸندە تاعى بٸر قازاقستاندىق – ەكٸنشٸ ورتا سالماقتاعى بوكسشى ەلي احمەدوۆ (16-0, 12 كو) ەكۆادور ٶكٸلٸ كارلوس گونگورامەن (18-0, 13 كو) كەزدەسەدٸ. بۇل جەكپە-جەكتٸڭ جەڭٸمپازى ەكٸنشٸ ورتا ساناتتاعى IBO ەلەم چەمپيونى اتانادى. ايتا كەتەيٸك, قازٸرگٸ ۋاقىتتا ەلي ەكٸنشٸ ورتا سالماقتا WBC International Silver چەمپيونى اتاعىنا يە.