توكيو قالاسىندا ٶتەتٸن ەلەم چەمپيوناتىنا قاتىساتىن قازاقستان ەيەلدەر قۇراماسى بەلگٸلٸ بولدى, دەپ حابارلايدى قازاقپارات.
قازاقستان دزيۋدو فەدەراتسيياسى مەلٸم ەتكەنٸندەي, 25 تامىز – 1 قىركٷيەك ارالىعىندا ەرلەر مەن ەيەلدەر اراسىندا ٶتەتٸن دٷنيەجٷزٸلٸك دوداعا ەلەمنٸڭ 143 ەلٸنەن 552 سپورتشى قاتىسپاقشى.
قازاقستان ەيەلدەر قۇراماسىنىڭ باس باپكەرٸ ەرلان الپىسباەۆتىڭ ايتۋىنشا, دزيۋدوشىلار قازٸرگٸ كەزدە الماتى وبلىسىندا قىزۋ دايىندالۋدا.
«ەلەم چەمپيوناتىندا بٸر قولا جٷلدە الامىز با دەپ جوسپارلاپ وتىرمىز. گالبادراح وتگونتسەگەگتەن باسقا سەۆارا نيشانباەۆانى جٷلدەگەرلەر قاتارىنان كٶرگٸمٸز كەلەدٸ. ەل قۇراماسىندا جاستار دا بار. مىسالى, بيىل تايبەيدە جاستار اراسىندا ازييا چەمپيونى اتانعان مٶلدٸر نارىنوۆانى ايتۋعا بولادى. تالانتتى جاستاردىڭ ەرەسەكتەر اراسىنداعى دوداعا قاتىسۋى ولارعا تەجٸريبە جيناۋعا مٷمكٸندٸك بەرەدٸ. تاعى بٸر دارىندى دزيۋدوشى اقمارال ناۋاتبەك جاراقاتىنا بايلانىستى بۇل بٸرٸنشٸلٸككە قاتىسا المايدى», دەدٸ ەرلان الپىسباەۆ.
سونىمەن ەلەم چەمپيوناتىندا ەل نامىسىن مىنا دزيۋدوشىلار قورعايدى:
وتگونتسەتسەگ گالبادراح (-48 كگ)
اننا كازيۋلينا (-52 كگ)
سەۆارا نيشانباەۆا (-57 كگ)
يولانتا بەردٸبەكوۆا (-63 كگ)
مٶلدٸر نارىنوۆا (-70 كگ)
زارينا رايفوۆا (-78 كگ)
نازگٷل ماراتوۆا (+78 كگ)
