بٷگٸن فۋتبولدان پرەمەر-ليگا كوماندالارى اراسىنداعى ەل بٸرٸنشٸلٸگٸنٸڭ تٶرتٸنشٸ تۋرى جالعاسىپ, تاعى ەكٸ ويىننىڭ نەتيجەسٸ بەلگٸلٸ بولدى, دەپ حابارلايدى "ۇلت اقپارات".
ەكٸنشٸ ويىن كٷنٸنە ٷش كەزدەسۋ بەلگٸلەنگەن. قازٸرگە ەديٸن ونىڭ ەكەۋٸ اياقتالدى.
العاشقى ويىندا قوستانايدىڭ «توبىلى» سىرت الاڭدا تالدىقورعاننىڭ «جەتٸسۋىن» 2:0 ەسەبٸمەن سٷرٸندٸردٸ. كەزدەسۋ بارىسىندا قوستانايلىق كلۋب ساپىنان الەكس امانوۆيچ 25, ەلگۋدجا لوبجانيدزە 74-مينۋتتاردا مەرگەندٸك تانىتتى.
تاعى بٸر ويىندا الماتىنىڭ «قايراتى» ٶز الاڭىندا تٷركٸستاننىڭ «تۇران» كلۋبىنا 5:1 ەسەبٸمەن ويسىراتا جەڭدٸ. الماتىلىق كوماندا ساپىنان بٸرٸنشٸ كەزەڭدە ايبول ەبٸكەن 2, 30, كامو وگانەسيان 5, حوسە كانتە 43-مينۋتتاردا گول سوقتى. ەكٸنشٸ كەزەڭنٸڭ 90-مينۋتىندا «تۇران» فۋتبولشىسى قاسىمحان تايىپوۆ ەسەپ ايىرماسىن قىسقارتسا, كٶپ ۇزاماي «قايرات» شابۋىلشىسى ادەرينسولا ەسەولا ويىننىڭ نٷكتەسٸن قويدى.
اتالعان تۋرداعى تٶرت ويىن كەشە, 9 سەۋٸردە ٶتكٸزٸلگەن بولاتىن.
سول كٷنٸ «تاراز» قاراعاندىنىڭ «شاحتەرٸن» 4:0 ەسەبٸمەن تٸزە بٷكتٸرسە, ورالدىڭ «اقجايىعى» پەتروپاۆلدىڭ «قىزىلجارىنا» 0:1 ەسەبٸمەن ەسە جٸبەردٸ. ال «اقتٶبە» مەن «ورداباسى» 4:4 ەسەبٸمەن تەڭ تٷستٸ.
اتالعان تۋرداعى سوڭعى ويىن بٷگٸن 19.00-دە ەلوردادا «استانا» مەن «اتىراۋ» اراسىندا بولادى.
