بٷگٸن فۋتبولدان قازاقستان كۋبوگىنىڭ جارتىلاي فينالى اياسىندا العاشقى ويىن ٶتكٸزٸلدٸ, دەپ حابارلايدى قازاقپارات.
بۇل كەزدەسۋدە قاراعاندىنىڭ «شاحتەرٸ» مەن قوستانايدىڭ «توبىلى» جاسىل الاڭعا شىقتى.
ويىن بارىسىندا قاراعاندىلىق كلۋبتىڭ بەلسەندٸلٸگٸ بايقالىپ تۇردى. نەتيجەسٸندە ولاردىڭ قاتارىنان بٸرٸنشٸ كەزەڭدە يدريس ۋماەۆ - 8, 45, داۆيد اتاناسكوسكي 13-مينۋتتاردا مەرگەندٸك تانىتسا, وعان 44-مينۋتتا قوستانايلىق كلۋبتان اسحات تاعىبەرگەن بٸر گولمەن جاۋاپ قايىردى.
ەكٸنشٸ كەزەڭدە «شاحتەر» ساپىنان داۆيد ماۆۋتور 48-مينۋتتا كٶزدەگەن نىسانادان مٷلت كەتكەن جوق. ال «توبىل» فۋتبولشىسى يگور سەرگەەۆ 58-مينۋتتا ەسەپ ايىرماسىن قىسقارتسا, 87-مينۋتتا قاراعاندىلىق ايدوس تەتتٸباەۆ قورىتىندى ەسەپتٸ بەلگٸلەدٸ.
وسىلايشا «شاحتەر» قارسىلاسىن 5:2 ەسەبٸمەن تٸزە بٷكتٸردٸ.
بۇل كەزدەسۋدە ەل فۋتبولىندا تۇڭعىش رەت VAR جٷيەسٸ قولدانىلدى.
7 قاراشادا ەلوردالىق «استانا» مەن الماتىنىڭ «قايراتى» جارىستىڭ اتالعان ساتىسىندا العاشقى ويىنىن ٶتكٸزەدٸ.
قارىمتا ويىندار 20 مەن 21 قاراشاعا بەلگٸلەنگەن. فينال 28 قاراشادا ٶتەدٸ.
