فۋتبولدان قازاقستان چەمپيوناتىنىڭ ەكٸنشٸ تۋرىندا تالدىقورعاندىق «جەتٸسۋ» الماتىداعى «جاس قىران» ستاديونىندا تٷركٸستاننىڭ «تۇران» كومانداسىن قابىلدادى, دەپ حابارلايدى "ۇلت اقپارات".
تالدىقورعاندىقتار ٶتكەن جىلعى بٸرٸنشٸلٸكتە ٷزدٸك التىلىقتى تٷيٸندەسە, تٷركٸستاندىقتار پرەمەر-ليگاعا بيىل قوسىلعان ەدٸ.
بٸرٸنشٸ تۋردا «جەتٸسۋ» ەل چەمپيونى «قايراتقا» 0:2 ەسەبٸمەن ەسە جٸبەرسە, «تۇران» ٶز الاڭىندا «استانامەن» تەڭ تٷسكەن-دٸ – 2:2.
بۇل جولى الاڭ يەلەرٸ ويىن تٸزگٸنٸن بٸردەن قولعا الىپ, 4-مينۋتتا بۇرىشتامادان بەرٸلگەن دوپتان كەيٸن ەستونييالىق جارتىلاي قورعاۋشى ارتەم دميتريەۆ ەسەپ اشتى.
جاقسى ويىن ٶرنەگٸن كٶرسەتكەن «جەتٸسۋ» فۋتبولشىلارىنىڭ بۇدان كەيٸن دە گول سوعاتىنداي مٷمكٸندٸكتەرٸ بولدى. اقىرى 69-مينۋتتا اسلان ەدٸل مەرگەندٸك تانىتسا, جەتٸ مينۋتتان كەيٸن اسحات بالتابەكوۆ ەسەپتٸ 3:0-گە جەتكٸزدٸ.
بۇدان سوڭ تٷركٸستاندىقتار قانشاما تىرىسقانىمەن, ەشتەڭە ٶزگەرگەن جوق. «جەتٸسۋ» ٸرٸ ەسەپپەن جەڭٸسكە جەتتٸ.
بٷگٸن ەكٸنشٸ تۋردا سونداي-اق «اقجايىق» - «اتىراۋ», «شاحتەر» - «ورداباسى», «اقتٶبە» - «توبىل» ماتچتارى ٶتەدٸ.
