بٷگٸن فۋتبولدان پرەمەر-ليگا كوماندالارى اراسىنداعى قازاقستان بٸرٸنشٸلٸگٸنٸڭ العاشقى تۋرىنداعى تاعى ٷش ويىن ٶتتٸ, دەپ حابارلايدى "ۇلت اقپارات".
بٷگٸنگٸ بٸرٸنشٸ كەزدەسۋ اقتاۋدا جەرگٸلٸكتٸ «كاسپيي» مەن «اقتٶبە» كوماندالارى اراسىندا بولدى. ويىن بارىسىندا الاڭ يەلەرٸ قاتارىنان ۋادجي ساليدٸڭ سوققان دوبىنا اقتٶبەلٸك كلۋبتان ماكسيم فەدين بٸر گولمەن جاۋاپ قايىردى. ويىن 1:1 ەسەبٸمەن اياقتالدى.
قىزىلوردادا جەرگٸلٸكتٸ «قايسار» مەن «تاراز» كوماندالارى شەبەرلٸك بايقاستى. بٸرٸنشٸ كەزەڭدە قوس كلۋب بەس گول سوعىپ ٷلگەردٸ. الدىمەن تارازدىق قورعاۋشى ەلدوس احمەتوۆ ٶز قاقپاسىنا دوپ ەنگٸزٸپ السا, 22-مينۋتتا قىزىلوردالىق ماقسات بايجانوۆ ەسەپتٸ ٷستەمەلەي تٷستٸ. بۇدان كەيٸن «تاراز» ساپىنان ابزال تاۋباي 25, ابىلايحان جۇمابەك 36, باۋىرجان بايتانا 45-مينۋتتاردا مەرگەندٸك تانىتىپ, ٶز كومانداسىن العا شىعاردى. ويىندا «قايسار» قارسىلاسىنا 2:3 ەسەبٸمەن ەسە جٸبەردٸ.
قوستانايدا «توبىل» مەن ورالدىڭ «اقجايىق» كلۋبتارى ٶزارا كٷش سىناستى. العاشقى كەزەڭدە 30-مينۋتتا قوستانايلىق كلۋب ساپىنان ازات نۇرعاليەۆ كٶزدەگەن نىسانادان مٷلت كەتكەن جوق. ال 75-مينۋتتا ونىڭ ەرٸپتەسٸ اسحات تاعىبەرگەن گول سوعىپ, قورىتىندى ەسەپتٸ بەلگٸلەدٸ. «توبىل» 2:0 ەسەبٸمەن جەڭٸسكە جەتتٸ.
ال شىمكەنتتە ٶتكٸزۋٸ بەلگٸلەنگەن «ورداباسى» مەن پەتروپاۆلدىڭ «قىزىلجار» كوماندالارى اراسىنداعى ويىن اۋا رايىنىڭ قولايسىزدىعىنان كەيٸنگە قالدىرىلدى. بۇل كەزدەسۋدٸڭ قاشان ٶتەتٸنٸ جٶنٸندە قوسىمشا شەشٸم قابىلدانادى.
ايتا كەتەيٸك, 13 ناۋرىزدا العاشقى تۋرداعى ٷش ويىن ٶتتٸ. ٶز الاڭىندا «قايرات» تالدىقورعاننىڭ «جەتٸسۋىن» 2:1 ەسەبٸمەن تٸزە بٷكتٸرسە, «اتىراۋ» قاراعاندىنىڭ «شاحتەرٸنەن» 0:1 ەسەبٸمەن جەڭٸلٸپ قالدى. ال تٷركٸستاندا جەرگٸلٸكتٸ «تۇران» مەن ەلوردالىق «استانا» 2:2 ەسەبٸمەن تەڭ تٷستٸ.
الداعى تۋر ويىندارى 19 جەنە 20 ناۋرىز كٷندەرٸ ٶتكٸزٸلەدٸ.
