فۋتبولدان «قايسار» كومانداسىنىڭ قۇرامى 80 پايىزعا جاڭاراتىن بولدى, دەپ حابارلايدى "ۇلت اقپارات".
بٷگٸندە فۋتبول كلۋبى تٷركييا جەرٸندە وقۋ-جاتتىعۋ جيىنىن ٶتكٸزۋدە. وندا 3 ناۋرىزعا دەيٸن دايىندىعىن جٷرگٸزەدٸ.
«كومانداعا جەرگٸلٸكتٸ مامان سۇلتان ەبٸلداەۆ باس باپكەر بولىپ تاعايىندالدى. وعان ەرلان شويتىموۆ پەن قانات شەرٸمبەتوۆ كٶمەكتەسەدٸ. ٶتكەن ماۋسىمدا ٶنەر كٶرسەتكەن ويىنشىلاردىڭ 80 پايىزى كوماندادان كەتتٸ. تٷركييادا لەگيونەرلەردٸ سىناقتان ٶتكٸزەمٸز. نەگٸزگٸ باسىمدىقتى جەرگٸلٸكتٸ ويىنشىلارعا بەرەمٸز. نەگٸزگٸ ماقسات – الداعى بەس جىلدىقتا تانىمال ويىنشىلار شىعارۋ», - دەدٸ «قايسار» فك ديرەكتورى سەرٸك دوسمانبەتوۆ.
كوماندا وبلىستا ٶتكەن جىلدىڭ سوڭى مەن بيىلعى جىلدىڭ باسىندا ەكٸ مەرتە جاتتىعۋ جيىنىن ٶتكٸزدٸ. جەرگٸلٸكتٸ فۋتبولشىلاردىڭ شەبەرلٸگٸن بايقاپ كٶردٸ. كٶزگە تٷسكەن 12 اياقدوپشىنى باس باپكەر انتاليياداعى جيىنعا شاقىرعان. ولاردىڭ قاتارىندا قاقپاشى نۇرىمجان سالايدىن, قورعاۋشىلار - ەلجاس سارباي, ولجاس التاەۆ, ابىلايحان تٶلەگەنوۆ, دانييار ەلٸمجان, جارتىلاي قورعاۋشىلار - بەكزات قۇرمانبەكۇلى, ايان قۇلماعانبەتوۆ, دۋمان نەرزٸلداەۆ, شابۋىلشىلار - شوقان ابزالوۆ, ٶركەن ماحان بار.
بٷگٸنگٸ كٷنگە دەيٸن «قايسار» تٷركييادا ەكٸ جولداستىق كەزدەسۋ ٶتكٸزٸپ ٷلگەردٸ. الدىمەن ماكەدونييانىڭ «شكەندييا» كلۋبىمەن 1:1 ەسەبٸمەن تەڭ تٷسٸپ, ودان كەيٸن ۋكراينانىڭ «دەسناسىن» 1:0 ەسەبٸمەن تٸزە بٷكتٸردٸ. كوماندا قۇرامىندا قاقپاشى ارتەم لەونوۆ, قورعاۋشى ەگور پوتاپوۆ, ۆۋك ميتوشەۆيچ, ليناس كليۋماۆيچۋس, جارتىلاي قورعاۋشى نيكيتا بوچاروۆ, شابۋىلشى ستەفان دەنكوۆيچ, كاروليس لاۋكجياميس سىندى شەتەلدٸك ويىنشىلار كەلدٸ. سونداي-اق, قازاقستاندىق قورعاۋشى ۇلار جاقسىباەۆ, جارتىلاي قورعاۋشى مارات شاحمەتوۆ, ارمان كەڭەسوۆ سەكٸلدٸ فۋتبولشىلار سىناقتان ٶتۋدە.
