بٷگٸن UEFA ەۋروپا ليگاسى ٷشٸنشٸ ٸرٸكتەۋ ساتىسىندا الماتىلىق «قايرات» سىرت الاڭدا ارمەنييانىڭ «الاشكەرت» كومانداسىنان جەڭٸلٸپ قالدى, دەپ حابارلايدى "ۇلت اقپارات".
ەكٸ كوماندا اراسىنداعى العاشقى كەزدەسۋدە 0:0 ەسەبٸ تٸركەلدٸ. سوندىقتان ولاردىڭ بٸرٸ بٷگٸن جەڭٸسكە جەتۋٸ تيٸس بولاتىن.
ويىننىڭ بٸرٸنشٸ كەزەڭٸندە ەكٸ كوماندا بٸر-بٸردەن گول سوقتى. الدىمەن «الاشكەرت» ويىنشىسى جوزە ەمبالو 43-مينۋتتا ەسەپ اشسا, وعان قازاقستاندىق ايبول ەبٸكەن 45-مينۋتتا بٸر گولمەن جاۋاپ قايىردى.
ەكٸنشٸ كەزەڭدە جوزە ەمبالو 50-مينۋتتا تاعى بٸر گولدىڭ اۆتورى اتاندى. ال 61-مينۋتتا «قايراتتىڭ» شابۋىلشىسى ارتۋر شۋشەناچەۆ تارازى باسىن تەڭەستٸردٸ. ويىن وۆەرتايمعا ۇلاستى. وۆەرتايمنىڭ 103-مينۋتىندا ارمەنييالىق كلۋبتان الەكساندار گليشيچ قايتادان «الاشكەرتتٸ» العا شىعاردى. وسىلايشا «قايرات» قارسىلاسىنا 2:3 ەسەبٸمەن جەڭٸلدٸ. ەندٸ قازاقستاندىق كلۋب كونفەرەنتسييا ليگاسى پلەي-وفف ساتىسىندا سىنعا تٷسەدٸ.
ەكٸ كوماندا 2015 جىلى ەۋروپا ليگاسى ەكٸنشٸ ٸرٸكتەۋ ساتىسىندا كەزدەسكەن ەدٸ. ٶز الاڭىندا قازاقستاندىق كلۋب 3:0 ەسەبٸمەن جەڭسە, سىرت الاڭدا 1:2 ەسەبٸمەن ەسە جٸبەردٸ. نەتيجەسٸندە قازاقستاندىقتار جارىستى جالعاستىرعان.
الماتىلىق كوماندا بيىل ەۋروكۋبوكتى چەمپيوندار ليگاسىندا باستاعان بولاتىن. الماتىلىق كوماندا بٸرٸنشٸ ٸرٸكتەۋ ساتىسىندا يزرايلدٸڭ «ماككابي» (حايفا) كومانداسىن (2:0, 1:1) ورتا جولدا قالدىرىپ كەتتٸ.
ودان كەيٸن سەربييانىڭ «تسرۆەنا زۆەزدا» كومانداسىنا (2:1, 0:5) ەسە جٸبەرٸپ قويدى.
ەسكە سالاي كەتەيٸك, بۇعان دەيٸن ەلوردالىق «استانا» ٶز الاڭىندا فينلياندييانىڭ كۋپس كومانداسىنان جەڭٸلٸپ, جارىس جولىنان شىعىپ قالسا, قاراعاندىنىڭ «شاحتەرٸ» ۋكراينانىڭ «كولوس» كومانداسىن ورتا جولدا قالدىرىپ كەتتٸ.
