قازاقستان جۇرتشىلىعىنىڭ نازارىندا بولعان ۇلتتىق ۇلاننىڭ مەرزٸمدٸ ەسكەري قىزمەتشٸسٸ ەربايان مۇحتار قايتىس بولدى. بۇل تۋرالى Orda.kz رەداكتسيياسىنا ونىڭ اناسى حابارلاعان.
بۇعان دەيٸن ەرباياننىڭ جاعدايى كٷرت ناشارلاپ, ۇلتتىق شۇعىل مەديتسينا ٷيلەستٸرۋ ورتالىعىنا شۇعىل تٷردە جاتقىزىلعانى بەلگٸلٸ بولعان. تٷركييادا ۇزاق ۋاقىت ەم الىپ, وڭالتۋ كۋرسىنان ٶتكەننەن كەيٸن ونىڭ جاعدايى بٸرشاما جاقسارعانىمەن, كەيٸن دەرٸگەرلەر قايتادان دەنساۋلىعىنىڭ ناشارلاعانىن تٸركەگەن ەدٸ.
وتباسىنىڭ مٷددەسٸن قورعاپ جٷرگەن زاڭگەر ينگا يمانبايدىڭ ايتۋىنشا, ەرباياننىڭ اتا-اناسىنا اۋرۋحانادان حابارلاسىپ, ونىڭ جٷرەگٸ توقتاپ قالعانىن جەتكٸزگەن.
– جارتى ساعات بۇرىن ەرباياننىڭ اتا-اناسى قوڭىراۋ شالدى. ولارعا اۋرۋحانادان حابارلاسىپ, جٷرەگٸ توقتاپ قالعانىن ايتقان. اتا-اناسى اۋرۋحاناعا ەندٸ عانا جەتكەن. مەنٸڭشە, اقپارات راستالدى. ەكٸ جىل بويى ەرباياننىڭ ٶمٸرٸ ٷشٸن وتباسىمەن بٸرگە كٷرەستٸك. قازٸر قانداي كٷيدە ەكەنٸمدٸ سٶزبەن جەتكٸزۋ قيىن, – دەدٸ زاڭگەر.
ەربايان مۇحتاردىڭ وقيعاسى 2023 جىلدىڭ سوڭىندا قوعامدا ٷلكەن رەزونانس تۋدىرعان بولاتىن. ۇلتتىق ۇلان قاتارىندا قىزمەت اتقارىپ جٷرگەن كەزٸندە ول اۋىر باس-مي جاراقاتىن الىپ, كوماعا تٷسكەن. ەسكەري بٶلٸم ٶكٸلدەرٸ سارباز دەرەتحانادا قۇلاپ, باسىن سوعىپ العانىن مەلٸمدەگەنٸمەن, ونىڭ تۋىستارى بۇل نۇسقاعا كٷمەن كەلتٸردٸ.
الماتىداعى ورتالىق كلينيكالىق اۋرۋحانادا ەم العاننان كەيٸن ەربايان ەسٸن جيعان. جاقىندارىنىڭ ايتۋىنشا, ول ىممەن ٶزٸن سوققىعا جىققانىن كٶرسەتكەن. كەيٸن تاعى بٸر وپەراتسييا جاسالىپ, ودان سوڭ قايتادان كوماعا تٷسكەن.
باستاپقىدا سارباز الماتىدا ەمدەلٸپ, كەيٸن استاناداعى ۇلتتىق نەيروحيرۋرگييا ورتالىعىنا اۋىستىرىلدى. اۋرۋحانادان شىققاننان كەيٸن وتباسى شەتەلدە ەم الۋ ٷشٸن قاراجات جيناۋ ناۋقانىن باستاعان.
قازاقستاندىقتار ەرباياننىڭ ەمٸنە 220 ميلليون تەڭگەدەن استام قارجى جينادى. 2024 جىلدىڭ كٷزٸندە ول تٷركيياعا وڭالتۋ ەمٸن الۋعا جٸبەرٸلگەن بولاتىن.
وقيعاعا بايلانىستى قۇقىق قورعاۋ ورگاندارى قىلمىستىق ٸس قوزعاعان. كەيٸن ساربازدى ەمدەۋگە قاتىسقان مەديتسينا قىزمەتكەرلەرٸنە قاتىستى دا بٶلەك تەرگەۋ باستالعان.
