بٷگٸن قر باس سانيتار دەرٸگەرٸ جانداربەك بەكشين الماتى وبلىسىنىڭ پانفيلوۆ اۋدانىنداعى ٷش شەكارا بەكەتٸندە ورنالاسقان مەديتسينالىق پۋنكتٸلەردٸ تەكسەردٸ, دەپ حابارلايدى "ۇلت اقپارات" پانفيلوۆ اۋدانى ەكٸمٸنٸڭ باسپاسٶز قىزمەتٸنە سٸلتەمە جاساپ.
قازٸرگٸ ۋاقىتتا «قورعاس» شەكارا ماڭى حالىقارالىق ىنتىماقتاستىق ورتالىعى ناۋرىزدىڭ بٸرٸنە دەيٸن جابىق تۇر. ال جولاۋشىلار تاسىمالى توقتاعان «Nur joly» مەن «التىنكٶل» بەكەتتەرٸندە سانيتار-ەپيدەميولوگ ماماندار كٷشەيتٸلگەن رەجيمگە كٶشكەن.
قازٸر جاركەنت قالاسىندا 100 ادامعا ارنالعان ارنايى سانيتارلىق وقشاۋلاۋ ورنى دايىن. سونداي-اق, قاجەت بولا قالعان جاعدايدا قولدانىلاتىن قوسىمشا 160 ورىن قاراستىرىلعان. بارلىق سانيتار-ەپيدەميولوگتار تولىق مەديتسينالىق جابدىقپەن قامتاماسىز ەتٸلگەن.
«اقپاننىڭ 20-سىنان باستاپ قىتايدان كەلگەن ادامداردىڭ بارلىعى 14 كٷنگە دەيٸن ارنايى سانيتارلىق ورىندا بولادى. ٶيتكەنٸ بۇل ۆيرۋستى جۇقتىرعان ادامنان بٸردەن ەشقانداي سىرقات بەلگٸلەرٸ بايقالماۋى مٷمكٸن. كوروناۆيرۋستىڭ اعزاداعى جاسىرىن كەزەڭٸ 14 كٷننەن 24 كٷنگە دەيٸن سوزىلۋ فاكتٸسٸ انىقتالعان. قىتايدان ٶتكەن ازاماتتار 14 كٷن جاتىپ شىققاننان كەيٸن دە ون كٷن تولىق باقىلاۋدا بولادى. سول سەبەپتٸ ساقتىق شارالارى جٷرگٸزٸلٸپ جاتىر», -دەدٸ جانداربەك بەكشين.
