نۇر-سۇلتان قالاسىنىڭ قۋىرشاق تەاترى 19 ناۋرىزدان باستاپ قاشىقتان جۇمىس ٸستەي باستادى, دەپ حابارلايدى "ۇلت اقپارات" ەلوردا ەكٸمدٸگٸنٸڭ رەسمي سايتىنا سٸلتەمە جاساپ.
قالالىق قۋىرشاق تەاترىنىڭ ەرتٸستەرٸ كٶپشٸلٸك قويىلىمداردى ونلاين تٷردە ٶتكٸزٸپ جاتىر. تەاتر قىزمەتكەرلەرٸنٸڭ جۇمىس ۋاقىتى كٷندٸزگٸ ساعات 14:00-دە باستالىپ, كەشكٸ ساعات 22:00-دە اياقتالادى.
«بٸز ساعات ەكٸدەن باستاپ ساحنالىق قويىلىمداردى بەينەتاسپاعا تٷسٸرٸپ, ونى Instagram, Facebook جەلٸلەرٸنە جٷكتەيمٸز. 14:30-دا اكتەرلٸك شەبەرلٸككە ارنالعان ۆيدەو ساباق, 15:00-دە تٸكەلەي ەفير ۇيىمداستىرىلادى. تٸكەلەي ەفيرگە تەك بٸزدٸڭ ەرتٸستەر عانا ەمەس, ٶزگە دە تەاترلارداعى ەرٸپتەستەرٸمٸز, سۋرەتشٸلەر, بەلگٸلٸ بالالار پسيحولوگتارى شىعادى», - دەيدٸ نۇر-سۇلتان قالاسى قۋىرشاق تەاترىنىڭ ۇيىمداستىرۋ بٶلٸمٸ مەڭگەرۋشٸسٸ مەيٸرٸم ارعىمباەۆا.
ونىڭ ايتۋىنشا, YouTube ارناسى ارقىلى قازاق, ورىس تٸلدەرٸندە بەس قويىلىم تاماشالاۋعا بولادى. 21 ناۋرىز بەن 18 سەۋٸر ارالىعىندا اكتەرلٸك شەبەرلٸك پەن ساحنالىق قوزعالىس بويىنشا 21 ماستەر-كلاسس ٶتكەن. 15 اۋديو ەرتەگٸ جازىلىپ, سۋرەتشٸ, پسيحولوگ, ەرتٸستەردٸڭ قاتىسۋىمەن 20 تٸكەلەي ەفير ۇيىمداستىرىلعان. بەلگٸلٸ بولعانداي, قاشىقتاعى جۇمىس كەزٸندە قويىلىمدار مەن ەفيرلەردٸ 19 350 ادام تاماشالاعان.
ايتا كەتسەك, نۇر-سۇلتان قالالىق قۋىرشاق تەاترى 2010 جىلى اشىلدى. تەاتر ۇجىمى العاشقى كٷندەردەن باستاپ جاس كٶرەرمەندەردٸ قىزىقتى قويىلىمدارىمەن قۋانتىپ كەلەدٸ. ونىڭ رەپەرتۋارىندا جاس ۇرپاقتى وتانسٷيگٸشتٸككە, ادامگەرشٸلٸككە تەربيەلەپ, تٸل مەن مەدەنيەتتٸ, دەستٷرلٸ قۇندىلىقتاردى قۇرمەتتەۋگە باعىتتالعان 28 قويىلىم بار. تەاتر قۇرىلعاننان بەرٸ كٶرەرمەن نازارىنا 28 پرەمەرا ۇسىنىلعان.
