نۇر-سۇلتان قالاسىندا تۇرعىن ٷيلەردٸ گازداندىرۋ جالعاسۋدا. بٷگٸن مىڭىنشى تۇتىنۋشىنىڭ ٷيٸنە «كٶگٸلدٸر وتىن» قوسىلدى, دەپ حابارلايدى قازاقپارات.
– جىل سايىن كٶمٸر جاعىپ, ٷيدٸ جىلىتاتىنبىز. كٷندە وسىلاي شەلەك - شەلەك كٶمٸر تاسىدىق. ەندٸ بٸزگە گاز كەلدٸ. گاز ماماندارىنا مىڭ العىس. قازٸر بۇل كٶمٸردٸڭ كەرەگٸ جوق, – دەيدٸ قىزىلكٶل كٶشەسٸندەگٸ ٷيدٸڭ يەسٸ قانات بەكٸباەۆ.
– گاز كٶمٸرگە قاراعاندا ەلدەقايدا جاقسى. كٷلدٸ شىعارىپ, ٷيگە وتىن ەكەلۋدٸڭ قاجەتٸ جوق. 60 جىلدان بەرٸ پەش جاعىپ كەلەمٸن. ەندٸ بۇل بەينەتتەن قۇتىلدىق, – دەيدٸ ەليما اپا ۇلىنىڭ سٶزٸن قوستاپ.
ەلوردانى گازداندىرۋ جوباسى بويىنشا نۇر-سۇلتاندا گاز تاراتۋ جەلٸلەرٸنٸڭ قۇرىلىسى 2023 جىلعا دەيٸن 3 كەزەڭگە بٶلٸنگەن.
بٷگٸندە جالپى ۇزىندىعى 413,32 كم جەلٸلەردٸ قۇرايتىن 1-كەزەڭدەگٸ قۇرىلىستىڭ 8 ٸسكە قوسۋ كەشەنٸ (قك) ٷشٸن گاز قۇبىرلارى مەن ونىڭ بويىنداعى قۇرىلىستار پايدالانۋعا بەرٸلدٸ. جەو-1, 2, 3-كە گاز قۇبىرلارى تارتىلدى, تەمٸرجولشىلار, ٶندٸرٸستٸك, كٶكتال-1 تۇرعىن الاپتارىندا گتپ ورناتىلدى, كٶكتال-2, ٶندٸرٸستٸك, اگروقالاشىق, وڭتٷستٸك-شىعىس ت.ا ٷيلەرگە گاز قۇبىرى تارتىلدى.
قازٸرگٸ ۋاقىتتا «قازترانسگاز ايماق» اق تاپسىرىسىمەن ينتەرناتسيونال, ميچۋرين جەنە كٷيگەنجار تۇرعىن الاپتارىندا 2-كەزەڭدەگٸ جەلٸلەردٸڭ قۇرىلىسى جٷرگٸزٸلۋدە. جاقىن ارادا بۇل ايماقتاردا گازدى ٸسكە قوسۋ جوسپارلانۋدا.
- مۇرجالار مەن جەلدەتۋ قۇبىرىنىڭ دۇرىس جۇمىس ٸستەۋٸ - قاۋٸپسٸزدٸك پەن دەنساۋلىقتىڭ كەپٸلٸ. ٶيتكەنٸ, گازدان ۋلانۋدىڭ ەڭ كٶپ وقيعاسى مۇرجانىڭ تارتپاۋىنان بولادى. سوندىقتان مۇرجالاردىڭ تالاپقا ساي بولۋىنا گاز قۇرىلعىلارىن پايدالانۋشىلار ەرەكشە مۇقييات قاراۋ كەرەك, - دەگەن «قازترانسگاز ايماق» اق استانا ٶندٸرٸستٸك فيليالىنىڭ ديرەكتورى دەۋلەت ارىقباەۆ, قاۋٸپسٸزدٸك شارالارىن ساقتاۋ قاجەتتٸگٸن تاعى بٸر ەسكە سالدى.
قازٸرگٸ ۋاقىتتا فيليال تۇتىنۋشىلارعا گازبەن جابدىقتاۋ جٷيەسٸنە قوسىلۋ ٷشٸن تەحنيكالىق شارتتاردى بەرۋمەن اينالىسۋدا.
