Nur-Sultan qalasynda turǵyn úilerdi gazdandyrý jalǵasýda. Búgin myńynshy tutynýshynyń úiine «kógildir otyn» qosyldy, dep habarlaidy QazAqparat.
– Jyl saiyn kómir jaǵyp, úidi jylytatynbyz. Kúnde osylai shelek - shelek kómir tasydyq. Endi bizge gaz keldi. Gaz mamandaryna myń alǵys. Qazir bul kómirdiń keregi joq, – deidi Qyzylkól kóshesindegi úidiń iesi Qanat Bekibaev.
– Gaz kómirge qaraǵanda áldeqaida jaqsy. Kúldi shyǵaryp, úige otyn ákelýdiń qajeti joq. 60 jyldan beri pesh jaǵyp kelemin. Endi bul beinetten qutyldyq, – deidi Álima apa ulynyń sózin qostap.
Elordany gazdandyrý jobasy boiynsha Nur-Sultanda gaz taratý jelileriniń qurylysy 2023 jylǵa deiin 3 kezeńge bólingen.
Búginde jalpy uzyndyǵy 413,32 km jelilerdi quraityn 1-kezeńdegi qurylystyń 8 iske qosý kesheni (QK) úshin gaz qubyrlary men onyń boiyndaǵy qurylystar paidalanýǵa berildi. JEO-1, 2, 3-ke gaz qubyrlary tartyldy, Temirjolshylar, Óndiristik, Kóktal-1 turǵyn alaptarynda GTP ornatyldy, Kóktal-2, Óndiristik, Agroqalashyq, Ońtústik-Shyǵys t.a úilerge gaz qubyry tartyldy.
Qazirgi ýaqytta «QazTransGaz Aimaq» AQ tapsyrysymen Internatsional, Michýrin jáne Kúigenjar turǵyn alaptarynda 2-kezeńdegi jelilerdiń qurylysy júrgizilýde. Jaqyn arada bul aimaqtarda gazdy iske qosý josparlanýda.
- Murjalar men jeldetý qubyrynyń durys jumys isteýi - qaýipsizdik pen densaýlyqtyń kepili. Óitkeni, gazdan ýlanýdyń eń kóp oqiǵasy murjanyń tartpaýynan bolady. Sondyqtan murjalardyń talapqa sai bolýyna gaz qurylǵylaryn paidalanýshylar erekshe muqiiat qaraý kerek, - degen «QazTransGaz Aimaq» AQ Astana óndiristik filialynyń direktory Dáýlet Aryqbaev, qaýipsizdik sharalaryn saqtaý qajettigin taǵy bir eske saldy.
Qazirgi ýaqytta Filial tutynýshylarǵa gazben jabdyqtaý júiesine qosylý úshin tehnikalyq sharttardy berýmen ainalysýda.
