ەلوردادا سيمفونييالىق وركەستردٸڭ سٷيەمەلدەۋٸمەن جەنە ۆوكالدىق ورىنداۋدا قازاق تٸلٸندە Disney-دٸڭ ليتسەنزييالانعان «جۇلدىزدار شەرۋٸ» كينوكونتسەرتٸ ٶتتٸ. كونتسەرتتٸك باعدارلاما قازاقستان ٷشٸن ارنايى جاسالىپ, كٶرەرمەندەرگە «بولاشاق» قورىنىڭ باستاماسىمەن مەملەكەتتٸك تٸلگە دۋبلياجدالعان ەيگٸلٸ كينوكارتينالاردىڭ كومپوزيتسييالارى ۇسىنىلدى.
«بولاشاق» قورىنىڭ قامقورشىلىق كەڭەسٸنٸڭ قۇرمەتتٸ مٷشەسٸ باۋىرجان بايبەك جينالعانداردى تەۋەلسٸزدٸكتٸڭ 30 جىلدىعىمەن قۇتتىقتاي وتىرىپ, تۇڭعىش پرەزيدەنت نۇرسۇلتان نازارباەۆتىڭ باستاماسىمەن قولعا الىنعان «بولاشاق» ستيپەنديياسىنىڭ ارقاسىندا مىڭداعان قازاقستاندىق جاستاردىڭ ەلەمنٸڭ جەتەكشٸ وقۋ ورىندارىندا بٸلٸم الۋعا قولى جەتكەنٸن اتاپ ٶتتٸ. 2011 جىلى باعدارلاما تٷلەكتەرٸ قور قۇرعان بولاتىن. اتالعان قوردىڭ قايىرىمدىلىق جەنە بٸلٸم باعدارلامالارىنان بٶلەك تاعى بٸر باعىتى مەملەكەتتٸك تٸلدٸڭ قولدانىسىن كەڭەيتۋ باستاماسى بولدى.
«2011 جىلى بٸز تٸكەلەي ەلباسىنىڭ قولداۋىمەن «ٶزٸڭنەن باستا» جوباسىن قولعا العان ەدٸك. بٷگٸندە قازاق تٸلٸندەگٸ ساپالى ەرٸ بەسەكەگە قابٸلەتتٸ كونتەنتتٸ ەلٸمٸزدٸڭ بالالارى عانا ەمەس, سونىمەن قاتار ەلەمدەگٸ وتانداستارىمىز دا كٶرۋ مٷمكٸندٸگٸنە يە بولدى. ٶزدەرٸڭٸزگە مەلٸم, «بولاشاق» قورى اۋتيست بالالاردىڭ مەسەلەلەرٸمەن دە بەلسەندٸ تٷردە اينالىسىپ جٷر. بٸرنەشە جىلدىڭ ٸشٸندە بٸز كٶپتەگەن ينكليۋزييانى قولداۋ كابينەتتەرٸن اشتىق. بٷگٸن وسى زالدا دا ەرەكشە قاجەتتٸلٸكتەرٸ بار بالالار قاتىسىپ وتىر. ەربٸر ساتىلعان بيلەتتەن تٷسكەن قاراجات ينكليۋزيۆتٸ بٸلٸم بەرۋ جوبالارىن دامىتۋعا جۇمسالاتىن بولادى», – دەدٸ باۋىرجان بايبەك.
كينوكونتسەرت بارىسىندا Nazima, دينارا سۇلتان, گٷلسٸم مىرزابەكوۆا, Ayree, دانييار ٶتەگەن, يندي ەدٸلباەۆا جەنە باسقا دا ەنشٸلەر Disney-دٸڭ كلاسسيكالىق تۋىندىلارى – «ارىستان پاتشا», «سۋ پەرٸسٸ», «مۋلان», «الاددين», «پوكاحونتاس», سونداي-اق «مۇزدى ٶلكە», «موانا», «اڭدار شاھارى» سەكٸلدٸ زاماناۋي انيماتسييالىق فيلمدەردٸڭ ەيگٸلٸ كومپويزتسييالارىن ورىندادى. شىعارمالار «استانا بالەت» تەاترىنىڭ سيمفونييالىق وركەسترٸنٸڭ سٷيەمەلدەۋٸمەن شىرقالدى. وركەستردٸڭ باس ديريجەرٸ – ارمان ورازعاليەۆ.
«وسىناۋ عاجايىپ كونتسەرت – قوردىڭ 10 جىلدىق مەرەيتويىنىڭ قۇرمەتٸنە وراي ەلوردا تۇرعىندارىنا جاساعان تارتۋى. بۇل مۋلتيمەدەني ٸس-شارا بالالاردى سٷيٸكتٸ مۋلتفيلمدەرٸ ارقىلى كلاسسيكالىق اسپاپتىق مۋزىكا تىڭداۋعا ىنتالاندىرا وتىرىپ, انا تٸلٸمٸزدٸڭ بايلىعى مەن شۇرايلىلىعىن پاش ەتەدٸ. كينوكونتسەرت بٸزدٸڭ قازاق تٸلٸندە ساپالى كونتەنت جاساۋ بويىنشا ۇزاق جىلعى جۇمىسىمىزدىڭ جالعاسى بولىپ وتىر. وسىناۋ جوبالارعا 1,5 ملرد. تەڭگە بٶلگەن 22 كومپانييانىڭ دەمەۋشٸلٸك كٶمەگٸنٸڭ ارقاسىندا جەتەكشٸ كينوكومپانييالاردىڭ 38 فيلمٸ دۋبلياجدالدى», – دەپ اتاپ ٶتتٸ قوردىڭ قامقورشىلىق كەڭەسٸنٸڭ تٶراعاسى دينارا گاپلان.
