ەلوردادا بالالارعا ارنالعان كارديوحيرۋرگييالىق ورتالىق اشىلادى. ەلباسى كٸتاپحاناسىندا مەديتسينا قىزمەتكەرلەرٸمەن كەزدەسكەن ۆيتسە-پرەمەر ەرالى توعجانوۆ وسىنداي مەلٸمەت ايتتى, دەپ حابارلايدى قازاقپارات.
«بٸز مەديتسينا قىزمەتكەرلەرٸن دايارلاۋعا گرانتتار سانىن ارتتىرۋدى كٶزدەپ وتىرمىز. وسىلايشا, پاندەميياعا قاراماستان, ەلدە وڭ مەديتسينالىق-دەموگرافييالىق ديناميكا ساقتالۋدا. 2020 جىلدىڭ قورىتىندىسى بويىنشا انا ٶلٸمٸ مەن قاتەرلٸ اۋرۋلاردان بولاتىن ٶلٸم-جٸتٸم 3%-عا تٶمەندەدٸ. ەرينە, بۇل سانداردىڭ ارتىندا ادام ٶمٸرٸ, مەديتسينا قىزمەتكەرلەرٸنٸڭ قاجىرلى ەڭبەگٸ تۇر», - دەدٸ ەرالى توعجانوۆ.
ونىڭ ايتۋىنشا, بٷگٸندە وتاندىق مەديتسينا بٸرنەشە باعىت بويىنشا حالىقارالىق دەڭگەيدە بەسەكەگە قابٸلەتتٸ جٷيە قالىپتاستىرىپ ٷلگەرگەن.
«ەلٸمٸزدە جوعارى تەحنولوگييالى مەديتسينالىق كٶمەكتٸڭ 78 تٷرٸ حالىققا قولجەتٸمدٸ. بيىل بٸز زاماناۋي اپپاراتتى قولدانا وتىرىپ, ورتالىق جٷيكە جٷيەسٸ اۋرۋلارىن ەمدەۋدٸڭ راديوحيرۋرگييالىق ەدٸسٸن ەنگٸزۋدٸ جوسپارلاپ وتىرمىز. بيىل Nazarbayev University جانىنان بالالار كارديوحيرۋرگييالىق ورتالىعىن اشۋ جوسپارلانىپ وتىر» - دەدٸ پرەمەر-مينيستردٸڭ ورىنباسارى.
