پاۆلودار وبلىسىنىڭ ەكٸباستۇز قالاسىندا سينتەتيكالىق ەسٸرتكٸ ٶندٸرەتٸن جاسىرىن زەرتحانا ەشكەرەلەندٸ. پوليتسييا گاراجدا ٸرٸ كٶلەمدە «سينتەتيكا» ٶندٸرٸسٸن جولعا قويعان اعايىندى ەكٸ تۇرعىندى ۇستادى, دەپ حابارلايدى ult.kz.
ٸشكٸ ٸستەر مينيسترلٸگٸنٸڭ مەلٸمەتٸنشە, ارنايى جەدەل-تەرگەۋ ٸس-شارالارى بارىسىندا تۇرعىن ٷي اۋلاسىنداعى گاراجدان سينتەتيكالىق ەسٸرتكٸ ٶندٸرۋگە ارنالعان تولىق جابدىقتالعان زەرتحانا انىقتالعان.
تٸنتۋ كەزٸندە 10 كەلٸدەن استام الفا-PVP پسيحوتروپتىق زاتى, 860 ليتر حيمييالىق سۇيىقتىق, ونىڭ ٸشٸندە 300 ليترلٸك رەاكتور-سىيىمدىلىق, زەرتحانالىق ىدىستار, تارازىلار مەن جەكە قورعانىس قۇرالدارى تەركٸلەندٸ.
تەرگەۋ بارىسىندا كٷدٸكتٸلەردٸڭ ەرەكەتٸن «Signal» مەسسەندجەرٸ ارقىلى بايلانىسقان كۋراتور ٷيلەستٸرٸپ وتىرعانى انىقتالعان. ول ەسٸرتكٸ ٶندٸرۋدٸڭ بارلىق كەزەڭٸن باقىلاپ, پرەكۋرسورلار سالىنعان جاسىرىن ورىنداردىڭ مەكەنجايلارىن بەرٸپ وتىرعان.
اتالعان فاكتٸ بويىنشا قر قىلمىستىق كودەكسٸنٸڭ 297-1-بابى بويىنشا سوتقا دەيٸنگٸ تەرگەۋ باستالدى. كٷدٸكتٸلەر ۋاقىتشا ۇستاۋ يزولياتورىنا قامالدى.
قازٸر قۇقىق قورعاۋ ورگاندارى پرەكۋرسورلاردى جەتكٸزۋ ارنالارى مەن ەسٸرتكٸ ٶندٸرٸسٸن ۇيىمداستىرۋعا قاتىسى بولۋى مٷمكٸن باسقا دا ادامداردى انىقتاپ جاتىر.
ٸشكٸ ٸستەر مينيسترلٸگٸ ەسٸرتكٸ ٶندٸرۋگە باعىتتالعان كەز كەلگەن ەرەكەت قاتاڭ تٷردە توقتاتىلاتىنىن مەلٸمدەدٸ. ٸس بويىنشا تەرگەۋ جالعاسىپ جاتىر.
