Pavlodar oblysynyń Ekibastuz qalasynda sintetikalyq esirtki óndiretin jasyryn zerthana áshkerelendi. Politsiia garajda iri kólemde «sintetika» óndirisin jolǵa qoiǵan aǵaiyndy eki turǵyndy ustady, dep habarlaidy ult.kz.
Ishki ister ministrliginiń málimetinshe, arnaiy jedel-tergeý is-sharalary barysynda turǵyn úi aýlasyndaǵy garajdan sintetikalyq esirtki óndirýge arnalǵan tolyq jabdyqtalǵan zerthana anyqtalǵan.
Tintý kezinde 10 keliden astam alfa-PVP psihotroptyq zaty, 860 litr himiialyq suiyqtyq, onyń ishinde 300 litrlik reaktor-syiymdylyq, zerthanalyq ydystar, tarazylar men jeke qorǵanys quraldary tárkilendi.
Tergeý barysynda kúdiktilerdiń áreketin «Signal» messendjeri arqyly bailanysqan kýrator úilestirip otyrǵany anyqtalǵan. Ol esirtki óndirýdiń barlyq kezeńin baqylap, prekýrsorlar salynǵan jasyryn oryndardyń mekenjailaryn berip otyrǵan.
Atalǵan fakti boiynsha QR Qylmystyq kodeksiniń 297-1-baby boiynsha sotqa deiingi tergeý bastaldy. Kúdiktiler ýaqytsha ustaý izoliatoryna qamaldy.
Qazir quqyq qorǵaý organdary prekýrsorlardy jetkizý arnalary men esirtki óndirisin uiymdastyrýǵa qatysy bolýy múmkin basqa da adamdardy anyqtap jatyr.
Ishki ister ministrligi esirtki óndirýge baǵyttalǵan kez kelgen áreket qatań túrde toqtatylatynyn málimdedi. Is boiynsha tergeý jalǵasyp jatyr.
