2021 جىلى "نوۆايا گازەتانىڭ" باس رەداكتورى دميتريي مۋراتوۆقا بەرٸلگەن نوبەل سىيلىعىنىڭ لاۋرەاتى مەدالٸ اقش اۋكتسيونىندا 103 جارىم ميلليون دوللارعا ساتىلدى. بۇل اقپارات امەريكانىڭ Heritage Auctions ساۋدا ٷيٸنٸڭ سايتىنا شىققان. ساتىپ الۋشىنىڭ اتى-جٶنٸ بەلگٸسٸز.
ساۋدانىڭ ٶزٸ 20 ماۋسىم – دٷنيەجٷزٸلٸك بوسقىندار كٷنٸ ٶتكەن.
اۋكتسيون باستالماس بۇرىن مۋراتوۆقا "ماراپاتىڭىزدى ساتۋعا دايىنسىز با" دەگەن سۇراق قويىلدى, ول "يە" دەپ جاۋاپ بەردٸ.
ستاۆكالار 700 مىڭ دوللاردان باستالدى, بٸراق بٸرنەشە مينۋت ٸشٸندە مەدالعا ۇسىنىس بٸرنەشە ميلليون دوللاردان استى. 16,6 ميلليون دوللار سوماسىنان كەيٸن بەلگٸسٸز ساتىپ الۋشى تەلەفون ارقىلى 103,5 ميلليون دوللارعا ستاۆكا جاسادى, ونى ەشكٸم توقتاتا المادى.
اۋكتسيوننان تٷسكەن اقشانىڭ بەرٸ ۋكراين بوسقىندارى مەن ولاردىڭ بالالارىنا جۇمساۋ ٷشٸن بٸرٸككەن ۇلتتار ۇيىمىنىڭ بالالار قورىنا (يۋنيسەف) اۋدارىلادى.
باق جازۋىنا قاراعاندا, بۇل - نوبەل سىيلىعىنىڭ تاريحىنداعى ەڭ قىمبات باعاعا ساتىلعان مەدال. ول نوبەل مەدالٸنٸڭ بۇعان دەيٸنگٸ رەكوردىنان 20 ەسە اسىپ تٷستٸ - 2014 جىلى Christie's اۋكتسيونىندا دنق مولەكۋلاسىنىڭ قۇرىلىمىن اشقان امەريكالىق بيولوگ دجەيمس ۋوتسوننىڭ ناگراداسى 4,76 ميلليون دوللارعا باعالانعان ەدٸ.
